Суд во Париз денеска донесе одлука за предвремено ослободување од затвор на поранешниот претседател на Франција, Никола Саркози, додека го чека исходот од неговата жалба.
Оваа одлука следува само неколку недели откако 70-годишниот конзервативен политичар почна да ја издржува петгодишната затворска казна поради заговор за прибирање нелегални средства за претседателската кампања од Либија.
Саркози беше осуден на 21 октомври, откако во септември Судот го прогласи за виновен за криминален заговор поврзан со обиди на негови блиски соработници да обезбедат финансирање за кампањата за претседателските избори во 2007 година од покојниот либиски лидер Моамер ел Гадафи.
Тој беше ослободен од сите останати обвиненија, меѓу кои и за корупција и незаконско финансирање на изборната кампања.
