Претседателката на Европската комисија, Урсула фон дер Лајен, планира да патува во Австралија месецов за да го потпише договорот за безбедност и трговија, известува „Политико“. Нејзиното патување ќе следува по состанокот закажан за идната недела меѓу европскиот комесар за трговија Марош Шефчович и неговиот австралиски колега Дон Фарел, во Брисел, изјави второ лице. На двете лица им е дадена анонимност бидејќи распоредите сè уште се неизвесни.
Брисел и Канбера се обидуваат да ги оживеат трговските преговори што пропаднаа на крајот од 2023 година поради несогласувања околу квотите за говедско и јагнешко месо. Квотите сè уште се преговараат меѓу Канбера и Брисел.
Заменик-портпаролот на Европската комисија, Олоф Гил, ја потврди средбата меѓу Шефчович и Фарел, но не и посетата на Фон дер Лајен на Австралија.
Земјите од ЕУ минатиот декември ѝ дозволија на комисијата да преговара за договор за одбрана со Австралија. Потпишувањето таков договор би дошло по потпишаните безбедносни и одбранбени партнерства со Велика Британија, Канада и неодамна со Индија.
Договорот со Австралија би ѝ отворил пристап на ЕУ до огромните резерви на стратешки минерали во земјата. Австралија е најголемиот производител на литиум во светот, а исто така ги поседува и вторите најголеми резерви на бакар во светот. Р.С.
