Претседателот на Косово Хашим Тачи нагласи дека западните сојузници на Косово не можеле до денес да ја убедат Србија да ја признае независноста на Косово. Тие не можат да гарантираат дека тоа ќе го сторат ниту во блиска иднина.
Во авторски текст објавен на неговиит веб-сајт, Тачи наведува дека признавање на Косово од страна на Србија е главна пречка за евроатланскиот пат на Косово.
– Некој може да каже дека Србија треба да го признае Косово без условувања и во рамки на сегашните граници. И јас го сакам истото. Но, дали мисите дека ние ќе ја убедиме Србија да направи такво нешто набрзо? За жал, не. А, ЕУ и нашите сојузници САД, Германија, Британија, Франција, Италија и многу други држави дали мислите дека тие ќе ја убедат Србија да го признае Косово: Повторно одговорот е „не“- вели Тачи.
Според него, договорот меѓу Белград и Приштина може да се постигне само доколку двете страни направат компромис.
Тој повторно предлага опција за корекција на границите со Србија.
– Аргументирав дека евентуален договор за мирна корекција на границите со Србија, на Косово му обезбедува признавање од страна на Србија и припојување на Прешево, Бујановац и Медвеѓа на нашата држава. Очекував рационални противаргументи, но до денес слушнав само бучава и во најлош случај омраза. Косово е многу мала држава за да произвдедува толку многу омраза што го дели нашето општество-наведува тој.
