Во Обединетото Кралство драстичен пораст на криминалот чии причинители се албански државјани и нивни криминални банди
Продолжуваат обвинувањата на релацијата Албанија – Велика Британија, откако британските надлежни служби почнаа сѐ погласно да реагираат на порастот на криминалот во кој се вмешани албански државјани, а особено откако драстично се зголеми нивниот број во рамките на бегалските конвои што секојдневно пристигнуваат на Островот.
Најновата изјава во рамките на билатералната расправија е онаа на албанската министерка за Европа и надворешни работи Олта Џачка, која реагираше на изјавата на британскиот министер за емиграција Роберт Џенрик, кој изјавил дека „Албанците криминалци треба да се истераат од Обединетото Кралство“.
Во својата реакција објавена на социјалните мрежи таа оценува дека е „срамно раздвојување на заедница од министер со демократски принципи што враќа страшни спомени со неподнослива бруталност“.
– Вербален линч на цела нација на јазик што звучи како министерот да најавува отворена сезона за лов на Албанците само неколку недели по заедничкото коминике меѓу премиерот на Република Албанија и тој на Велика Британија, каде што тие позитивно ја оценија улогата на албанската дијаспора во Британија и нејзиниот важен придонес за културата, економијата и општеството на двете земји. Срамно раздвојување на заедница од министер со демократски принципи што враќа страшни спомени со неподнослива бруталност – пишува Џачка.
Претходно, на крајот на октомври лани, министерката за внатрешни работи Суела Браверман ги опиша како криминалци Албанците што одат илегално во Велика Британија, велејќи дека ја окупираат земјата, на што остро реагираше премерот Еди Рама.
Тој ја нападна владата на Велика Британија, велејќи дека Лондон мора да престане да ги обвинува Албанците за сопствените „неуспеси во политиката“, наведувајќи дека 70 отсто од 140.000 Албанци што живеат во Велика Британија се интегрирани во тамошното општество.
Веднаш следуваше реакција од кабинетот на премиерот на Обединетото Кралство, Риши Сунак, во кое беше наведено дека Британија останува посветена на борбата против трговијата со луѓе и дека има силни односи со Албанија.
Инаку, минатата година од над 45 илјади лица што илегално со моторни чамци преку каналот влегле на британска територија, најмалку 13 илјади биле албански државјани.
