Начинот на кој медиумите известуваат за масовно насилство, семејно насилство и самоубиства може да влијае на другите луѓе и се препорачува што помалку да се известува за самите сторители, се вели во препораките поднесени од канцеларијата на УНИЦЕФ до Здружението на новинари на Србија (УНС).
Се предупредува дека другите може да се идентификуваат со нив или да се инспирираат, а една од препораките до медиумите е да не ја објавуваат фотографијата на сторителите, покрај фотографијата на жртвата.
– Не известувајте за настанот на сензационалистички начин бидејќи тоа може да им даде поттик на луѓето кои сакаат негативен публицитет – една е од препораките.
Меѓу последиците од штетното известување, беше наведено, е можноста да се инспирираат имитатори кои во сторителот гледаат модел или херој.
– Одговорното известување може да го намали ризикот – се вели во препораките на УНИЦЕФ, кои ги проследи до УНС, пренесува Танјуг.
Како придобивка што заедницата ја има од одговорното известување, во препораките се наведува дека на овој начин „се обезбедува утеха на преживеаните, семејствата, заедниците, вклучително и семејството на сторителот“.
Одговорното известување ги охрабрува луѓето, се вели во препораките на УНИЦЕФ, да побараат помош за себе или за другите во случај на зголемен ризик од штетни дејствија.
