Унгарија нема да учествува во долгорочниот план на НАТО за помош на Украина, изјави унгарскиот министер за надворешни работи, Петер Сијарто, нарекувајќи го планот „луда мисија“, пренесува Хина.
Сојузниците на НАТО во април се согласија да започнат планови за долгорочна воена поддршка за Украина во борбата против руската инвазија преку формирање фонд вреден 100 милијарди евра. Според плановите, НАТО ќе преземе дел од координацијата од коалицијата предводена од САД наречена Рамштајн група. Шефот на унгарската дипломатија повтори дека унгарската Влада се противи на планот.
– Унгарија нема да се приклучи на лудата мисија на НАТО и покрај сите притисоци – рече Сијарто на настан во Лондон.
Владиниот портпарол Золтан Ковач, реагирајќи минатиот месец на иницијативата на НАТО, објави на платформата Екс дека Унгарија нема да поддржи ниту еден предлог на НАТО што би можел „да ја доближи Алијансата до војна или да ја претвори од одбранбена во офанзивна коалиција“.
Односите меѓу Будимпешта и НАТО се затегнати поради доцнењето на Унгарија со ратификувањето на влезот на Шведска во Алијансата, што конечно го направи во март, и поради блиските односи на унгарскиот премиер Виктор Орбан со Москва и покрај отпочнувањето на руската специјална воена операција во Украина во февруари 2022 година.
Американскиот амбасадор во Унгарија, Дејвид Пресман, претходно изјави дека сојузниците во НАТО ја предупредуваат Унгарија за опасностите од „блиските и се пошироки“ односите со Русија и дека, доколку тоа е политичкиот избор на Будимпешта, „ќе мора да одлучи како најдобро да ги заштити своите безбедносни интереси“.
