Студентите во блокада синоќа апелираа Универзитетот во Белград „да излезе со порадикални мерки на отпор“, во форма што ја сметаат за соодветна, јави дописникот на МИА од Белград.
Апелот е објавен за да може „сега синхроно студентите и претставниците на Универзитетот да истапат како хомогено тело“ што „се бори за честа и достоинството на академската заедница“.
Во објава на социјалните мрежи тие посочуваат дека повикот е неопходен „за да се врати заслужениот кредибилитет на Универзитетот“.
Тие ги осудија „изјавите, навредите, клеветите и заканите упатени до ректорот на Универзитетот во Белград, Владан Ѓокиќ и деканите на високообразовните институции“ и, како што наведоа, клевети и физички напад врз деканката на Филозофскиот факултет во Ниш, Наталија Јовановиќ.
Студентите во блокада ги осудуваат „сите обиди за заплашување на Универзитетот“ и наведуваат дека „ваквите постапки на носители на јавни функции бараат итна реакција“.
– Да беше државата тело, образованието ќе беше основна единица на структурата и функцијата на здравото тело, студентите ќе беа срцето, а Универзитетот ќе беше мозокот кој вози сè – додаваат тие.
За жал, како што наведоа, се сведоци на „потценување и пропаганда што се шири во општеството последниве денови“.
