Бугарија
Успешна заплена на една од најголемите пратки кокаин пронајдени досега беше објавена од бугарските гранични служби, кои соопштија дека дрогата била откриена во комбе со белгиски регистарски таблички што било на пат кон Турција.
Заплената на речиси 206 килограми кокаин е најголема досега на копнената граница на Бугарија, пренесува „Асошиејтед прес“. Дрогата скриена во 179 запечатени пакети што се наоѓале во пет куфери била откриена при претрес на возилото. Нејзината вредност се проценува на 20 милиони евра.
Осомничените за пренос на дрогата се идентификувани како дипломат од Демократска Република Конго акредитиран во Белгија, белгиски државјанин и бугарски возач, од страна на обвинителот на округот Хасково, Иван Стојанов. Осомничените се соочуваат со затворска казна до 20 години доколку бидат осудени за трговија со дрога. Истрагата што е во тек ја водат надлежните бугарски служби заедно со партнерски организации од ЕУ.
Бугарија се смета за клучна транзитна точка на балканската рута за трговија со дрога, која се користи за снабдување на Западна Европа со хероин од Азија и Блискиот Исток, како и со кокаин од Латинска Америка. Р.С.
