Во Нов Белград дојде до судир меѓу демонстрантите и полицијата во близина на седиштето на Српската напредна странка при што полицијата употреби солзавец.
Полицијата употреби солзавец и топовски истрели за да ги потисне стотиците демонстранти кои се движеа кон просториите на СНС.
Полицијата се обидва да ги растера демонстрантите кон зградата на Општина Нов Белград.
Граѓаните и студенти во блокада кои се движеа кон Парламентот и Пионирски парк каде се студентите кои се против блокади, беа запрени од српската жамдармерија кај Уставниот суд.
Кон луѓето кои протестираат од страна на насобраните кај Собранието, беа фрлани шишиња и пиротехника.
Во Нови Сад, членови и симпатизери на СНС повторно ги нападнаа учесниците на протестот со пиротехнички средства. Кон нив беа фрлани петарди и пиротехника.
Протести вечерва има во 30-на градови низ Србија поради нападот на поддржувачите на СНС што се случи синоќа во Врбас и во Бачка Паланка, кога кон демонстрантите беа фрлани пиротехнички средства и други предмети.
Во Врбас, 16 полицајци беа повредени, додека 52 граѓани се пријавија во болница со разни повреди, истакна директорот на полицијата Драган Васиљевиќ, зборувајќи за синоќешните протести во Врбас и Бачка Паланка.
Вучиќ: Ќе има промени во државниот апарат
Претседателот на Србија, Александар Вучиќ, вечерва во Белград изјави дека просториите на Српската напредна странка во Нови Сад биле „брутално нападнати“.
-Лоши вести доаѓаат вечерва од Нови Сад. Тие брутално ги нападнаа споредните простории на СНС. Има многу повредени граѓани – рече Вучиќ.
Тој додаде дека неговите поддржувачи „не сакаат ништо да уништат“ и дека нема да повикува на конфликти. Тој најави дека „доаѓаат големи промени во државниот апарат“.
-Се соочуваме со големи промени во државниот апарат. Мораме да се промениме себеси – рече тој.
Министерот за внатрешни работи на Србија, Ивица Дачиќ, се обрати вечерва наведувајќи дека еден полицаец е повреден во Нови Сад и ги повика сите граѓани да се разотидат.
-Еден полицаец е повреден. Имаше масовен напад и полицијата мораше да интервенира. Во други градови низ Србија има и напади врз полицијата или членовите на СНС кои се пред просториите. Улогата на полицијата е да го заштити јавниот ред и мир и ги предупредуваме сите да го почитуваат законот. Повикуваме на мир, ги повикуваме сите да се воздржат од вакви провокативни дејствија. Денеска, голем број членови на СНС се присутни пред нивните простории, тој број е поголем од оние што дојдоа да протестираат – рече Дачиќ.
Во Белград и во други српски градови, вечерва се одржуваат протести поради нападот на поддржувачите на СНС што се случи синоќа во Врбас и во Бачка Паланка, кога кон демонстрантите беа фрлани пиротехнички средства и други предмети.
