Грција прогласи вонредна состојба поради еколошка катастрофа
Грција минатата недела прогласи едномесечна вонредна состојба во централниот пристаништен град Волос, откако илјадници слатководни риби пцовисаа.
Властите ветија дополнително финансирање и друга поддршка за справување со масовниот помор, што е втора еколошка катастрофа во областа во рок од една година.
Зошто умреа толку многу риби?
Властите соопштија дека слатководните риби умреле како резултат на разорните поплави што минатата година го погодија централниот грчки регион Тесалија. Невремето поплави повеќе од 20 илјади хектари земја и повторно го наполни блиското езеро Карла (површината се зголеми за трипати), кое беше исушено во 1962 година во обид за справување со маларијата. Оттогаш, езерските води драстично се повлекоа како последица на силната суша, што ги тера рибите кон пристаништето Волос, кое се влева во Егејско Море. Но тие риби не можат да преживеат во солена морска вода и илјадници мртви риби ги затнаа водите околу пристанишниот град, кој е на околу три и пол часа возење северно од Атина.
Што преземаат властите?
Итната мерка за цивилна заштита ќе им овозможи на локалните власти да обезбедат средства и други ресурси за да го завршат чистењето на водата од пцовисаните риби. Вонредната состојба ја прогласи министерот за клима Василис Папагеоргиу и таа ќе трае до 30 септември.
Акцијата за отстранување на рибите трае веќе неколку дена, а регионалните власти веќе ангажираа употреба на рибарски мрежи, заедно со голема градежна оператива. Рибите потоа се товарат во камиони и се носат во печка за согорување. Властите минатата недела објавија дека отстраниле 100 тони риба.
Телевизискиот канал „Ертњуз“ објави дека два брода треба да ја продолжат операцијата за извлекување на рибата. Поставени се и специјални мрежи на устието на реката Ксирија за да се спречи акумулацијата на големи количества мртви риби.
Градоначалникот на Волос ги нападна регионалните власти, обвинувајќи ги дека дејствуваат премногу бавно, велејќи на прес-конференција дека мирисот на мртва риба е неподнослив. Туризмот во регионот опадна за речиси 80 отсто од минатогодишната поплава, соопшти локалната ресторанска и адвокатска комора.
– Ситуацијата со оваа мртва риба ќе биде смрт за нас. Кој посетител ќе дојде во нашиот град по ова – рече Стефанос Стефану, претседател на здружението.
Стопанската комора на Волос соопшти дека презема законски чекори за обесштетување по сериозен пад на комерцијалните активности. Државниот правобранител започна истрага за кризата. Во Грција има сѐ повеќе случаи на екстремни временски услови, кои научниците ги поврзуваат со климатските промени. Тие вклучуваат екстремни температури и појави на екстремен вишок и дефицит на врнежи, кои предизвикуваат сè повеќе шумски пожари и поплави. Р.С.
