Претседателот на Република Српска Милорад Додик, денеска во Бања Лука изјави дека народот ќе одлучи на референдум за неговиот претседателски мандат, кој денеска му беше одземен од Централната изборна комисија на Босна и Херцеговина (ЦИК) откако беше законски осуден на една година затвор и шестгодишна забрана за политичка активност, поради неспроведување на одлуките на високиот меѓународен претставник во БиХ.
– Мандатот ми го даде народот, затоа ќе го слушнам на референдумот, за мене и функцијата што ја извршувам, кој, врз основа на одлуката на Народното собрание, ќе се одржи во наредниот период – изјави Додик за новинарите по состанокот на претседателите на партиите од владејачката коалиција што се одржа во Бања Лука.
Според измените на Законот за референдум и граѓанска иницијатива, кои беа усвоени од владејачката коалиција во РС во јуни минатата година, за успех на референдумот е потребно мнозинство од излезени гласачи, а не мнозинство од вкупниот број гласачи регистрирани во избирачкиот список (педесет проценти плус еден), како што беше случај според претходно важечкиот закон.
Додик понатаму изјави дека владејачката коалиција на ентитетот „е решена да продолжи да ја брани уставната и дејтонската позиција на РС и наведува дека оваа позиција е силно загрозена од постапките на (високиот претставник) Кристијан Шмит, кој не е легитимен ниту потврден во Советот за безбедност, туку само една политичка волја стои зад него“.
Тој ги обвини бошњачките политичари дека нивната единствена цел била да го елиминираат од политичката сцена, но дека, како што рече, нема намера да ја напушти РС.
Горан Бубиќ, адвокатот на Додик, денеска поднесе барање до Судот на Босна и Херцеговина, Додик да плати казна од 36.500 конвертибилни марки (околу 18.700 евра) наместо една година затвор, јавија сараевски медиуми. Законот дозволува затворска казна до една година да се „откупи“ со плаќање парична казна.
