Во своето годишно обраќање пред Европскиот Парламент за „Состојбата на ЕУ“, претседателот на Европската комисија, Жан-Клод Јункер, предупреди на надворешните влијанија на Балканот.
– Мораме да го дефинираме на неотповиклив начин нашиот однос кон зачленувањето на земјите од Западниот Валкан, во спротивно други ќе го обликуваат нашето непосредно соседство – изјави Јункер во својот говор.
Тој истакна дека досегашните проширувања на ЕУ ги оценува како успешни, но дека сė уште „останува да се прават напори“, алудирајќи на проблемите со владеењето на правото во повеќе источноевропски земји како Унгарија, Полска и Романија.
Минатата година, првиот човек на ЕК побара да му се пружа „кредибилна перспектива“ на регионот на Западен Балкан.
– Ако сакаме повеќе стабилност во нашето соседство, тогаш мораме да одржиме кредибилна перспектива за проширувањета кон Западниот Балкан – рече Јункер.
Тој тогаш посочи дека е „јасно оти нема да има нови проширувања за време на мандатот на оваа Комисија и Парламент“, затоа што “ниту еден кандидат не е подготвен“.
Денешниот говор на Јункер беше фокусиран на предизвиците со кои се соочува Европската Унија, но не ги формулираше сите предлози што беа очекувани, како на пример федерализација на пограничната полиција со цел справување со миграциските текови. Тој сепак најави дека ЕК ќе предложи зголемување на оваа служба на 10 илјади полицајци до 2020 година.
