Турското обвинителство нареди апсење на 158 осомничени, вклучително и 33 припадници на војската, во опсежна операција насочена против лица наводно поврзани со муслиманскиот проповедник Фатулах Ѓулен, човек обвинет од турските власти дека стои зад неуспешниот пуч во 2016 година, објавија медиумите во регионот.
Истрагата во 41 провинција е дел од петгодишната пресметка со заедничката мрежа на Ѓулен, кој живее во САД и негира каква било вмешаност во државниот удар во Турција во јули 2016 година, во кој загинаа повеќе од 250 луѓе.
Во последната операција на турските власти, приведени се 97 лица, меѓу осомничените за обидот за државен удар се 110 воени питомци кои беа отпуштени од воените институции и 48 активни и неактивни воени лица.
По неуспешниот државен удар, околу 80.000 луѓе беа приведени, околу 150.000 државни службеници, воен персонал и други беа отпуштени или суспендирани, а повеќе од 20.000 луѓе беа протерани од турската армија, анализираат медиумите.
