Белград – Поради постабилната епидемиолошка состојба во Србија, во сила се нови мерки, од кои повеќето се однесуваат на угостителските објекти, продавниците за малопродажба, спортските настани и матурските прослави. Така, според српските медиуми, продавниците за малопродажба ќе можат да работат без ограничувања, а угостителските објекти ќе можат да работат на отворено без забрани, а во затворени простории до еден часот по полноќ и дозволена е музика. Исто така, дозволено е присуство на публика на стадионите и сите спортски настани. Капацитетот на отворените објекти е до 50 проценти, а во затворен простор до 30 проценти. Дозволени се матурски прослави, со максимум 500 луѓе во затворено. Од денеска се дозволени екскурзии.
Приштина – Американскиот амбасадор во Косово, Филип Коснет, изјави дека неговата земја смета оти Косово има обврска да формира заедница на српски општини и дека постои обврска да се почитуваат претходно преземените договори и обврски. Тој за Радио Плус изјави дека „историјата не започнала на денот кога беше формирана владата на Албин Курти“. На прашањето дали гледа простор за компромисно решение меѓу Белград и Приштина, Коснет одговори дека „смета дека имало многу тешки разговори и воздржаност пред да подготовките за преговори“, но дека „не треба да се дозволи тоа да нѐ обесхрабрува или вознемирува“.
Сараево – Полициски екипи од кантонот Сараево и кантонот од Централна Босна извршија претрес на 32 локации и уапсија 29 лица осомничени за злоупотреба на дрога и недозволено поседување оружје и муниција. Како дел од акцијата, со кодно име „Мрежа ИВ“, 23 лица беа уапсени во Зеница, две во Сараево и четири во кантонот Централна Босна, објави Министерството за внатрешни работи на кантонот Зеница-Добој.
Акцијата се спроведува во соработка со Федералната полициска управа и има цел апсење и гонење лица осомничени за кривични дела злоупотреба на дрога и недозволено поседување оружје и муниција.
