Софија – ГЕРБ ќе го предложи Даниел Митов за нов премиер на Бугарија. Претходно Бојко Борисов изјави дека тој нема да биде кандидат за премиер и оти ќе предложат човек со јасна проевропска и пронатовска ориентација. Митов во Министерството за надворешни работи влезе како човек на Реформаторскиот блок, како министер поддржуваше таква ориентација. Даниел Митов на 6 август 2014 година беше предложен од тогашниот претседател Росен Плевнелиев за министер за надворешни работи во техничката влада на Георги Близнашки. Својата позиција како заменик-министер ја задржа и во вториот кабинет на Борисов, а притоа му се приклучи на ГЕРБ и стана пратеник од неговите редови на последните парламентарни избори. („24 часа“)
Атина – Со 93 починати лица од ковид-19 за 24 часа, Грција бележи уште еден негативен рекорд за 2021 година по бројот на смртни случаи, а рекорден е и бројот на пациенти приклучени на апарати на одделите за интензивна нега во грчките болници, вкупно 802.
Според официјалните податоци од Националната организација за јавно здравје на Грција, регистрирани се 4.033 нови случаи, од кои 1.812 се во областа Атика, поширокиот регион на Атина, а 554 во Солун. Од почетокот на епидемијата, во Грција има 301.103 потврдени случаи на ковид-19, а починаа вкупно 9.054 лица. („Независен“)
Бисер балкански
Поштарите не разбираат кирилица
Хрватската пошта во Мостар одбила да прими писмо што било адресирано до субјект во Нови Сад. Причината за тоа е што испраќачот на писмото ја напишал адресата на примателот на кирилица! Објавувањето на оваа вест во медиумите во Србија предизвикаа силни реакции, а граѓаните во Хрватска, кои имаат српско потекло, го сметаат за нов „напад“ на правото да се користи кирилското писмо.
„Хрватската пошта“ во Мостар даде објаснување зошто било вратено писмото што било адресирано на „кирилска“ адреса во Нови Сад.
– Писмото во меѓународниот промет може да биде адресирано со кирилица, но називот на местото и називот на одредиштето односно државата, мора да бидат напишани со латинично писмо, во согласност со стандардите што се применуваат во меѓународниот поштенски сообраќај – се наведува во одговорот од „Хрватската пошта“.
Меѓутоа пратката што била напишана со кирилица и упатена на адреса во Нови Сад му била вратена на испраќачот со печат „забрането пишување на кирилица“ и со печат од поштата во Загреб, пренесуваат српските медиуми.
