Во организација на австриската влада утре во Виена ќе се одржи конференција за Западен Балкан.
Домаќинот на состанокот, австрискиот канцелар Себастијан Курц, во изјава за медиумите од регионот рече дека неговата цел е со оваа конференција да го врати Западен Балкан на високо место на агендата на ЕУ.
– Западен Балкан е регион кој е важен за нас во Австрија, и за мене лично. Кога бев министер за надворешни работи, започнав да се залагам за тој регион и го продолжив тоа како канцелар – рече тој.
Курц рече дека пандемијата на коронавирусот засенува многу теми и ги става во втор план, како и Западен Балкан.
– Главната цел на оваа конференција е да се подигне Западен Балкан на многу високо место во европската агенда. Ние сакаме да има посилен фокус на овој регион, како и тоа, сите изјави, разговори за европската перспектива, конечно да станат реалност – објасни австрискиот канцелар.
Според најавата на австриската влада, на конференцијата во Виена ќе учествуваат премиерите на Србија, Црна Гора, Македонија, на Босна и Херцеговина, косовскиот премиер и претставникот на ЕУ за дијалогот меѓу Белград и Приштина Мирослав Лајчак.
