„Нова Македонија“ во неколку продолженија ќе објави извадоци од книгата „Македонија не е Грција“ од турскиот автор Ердоган Ознал. Книгата е напишана врз основа на голем број користени документи од турските архиви, a објавена во Истанбул
Во времето на Османлиската Империја, Грција беше административна област. Значи, неа сега треба да ја викаме „република на старата Османлиска Империја Грција“
Многу Македонци пред стрелање наоѓале сили да кажат дека се Македонци. Така, селанецот Параскевов, кога го однеле на стрелање пред да го изрешетат куршумите, извикал: „Јас вистина се родив во Софија, но никогаш не бев ниту Бугарин, ниту Грк, туку јас сум Македонец“.
Денес во Грција е забрането да се зборува македонски, да се носи македонска носија и да се негуваат македонската традиција и македонските обичаи.
Водачот на македонското малцинство во Грција, Христос Сидиропулос, бидејќи во интервјуто дадено во списанието „ЕНА“ рекол дека е Македонец, во Атина против него се води истрага како државен непријател. Инаку, овој човек тврди дека денес во Грција живеат околу 1.000.000 Македонци.
Грција со сите свои сили се залага Република Македонија да не биде признаена од светската заедница. Словенија и Хрватска, кои беа во составот на Југославија, под притисок на Германија, беа признаени од Европската заедница. Поради Грција, Република Македонија сѐ уште не е признаена од Европската заедница. Исто така, Грција презеде големи дипломатски активности Република Македонија да не биде примена и во Обединетите нации.
Претседателот на Грција до претседателот на САД, Џорџ Буш, испрати писмо со кое бараше Америка да го почитува ставот на Европската заедница. На некоректните тврдења од страна на Грција можат да се дадат следните одговори:
СЕКОЈ НАРОД САМ СИ ГО ИЗБИРА СОПСТВЕНОТО ИМЕ
Во меѓународното право не е предвидено еден народ на друг да му биде кум и да му дава име. Република Македонија повеќе од 40 години се споменуваше со тоа име. Зошто Грција 40 и повеќе години не реагираше туку молчеше? Грција со своето барање, иако западна во една смешна и комична ситуација, сепак, успеа во меѓународната заедница оваа држава да се именува како „бивша југословенска Република Македонија“. Во време на Османлиската Империја, Грција беше административна област. Значи, неа сега треба да ја викаме „република на старата Османлиска Империја Грција“.
Дали во случајов Грција немаше да реагира? Убеден сум дека ќе реагираше, зашто таквата логика никому и не му користеше.
Ако на луѓето што се нарекуваат Македонци и се чувствуваат дека се Македонци, говорат македонски, Грција им ги познава историјата, културата, етносот и ако систематски се залага да ги уништува, тогаш не ми е јасно што добива таа, Грција, со промената на името? Значи ли тоа дека дури тогаш Република Македонија не ќе има територијални претензии спрема Република Грција.
Да тргнеме пак од грчката логика.
Од 540 година Истанбул е турски град, а Грците упорно го викаат Константинопол, Измир – Смирна, Едрене – Адријанополис. Треба ли да се верува дека Грција има територијални претензии спрема Турција?
Според логиката на Грција, ако Република Македонија го употребува името Македонија, значи има територијални претензии спрема Грција, тогаш не е ли тоа во колизија со новото упорно користење на имињата Константинопол, Смирна, Андријанополис и сл., градови што се турски а имаат грчки имиња. Ете, за таа цел убеден сум дека светот ќе ја види оваа грчка игра и нема повеќе да ѝ верува на Грција.
Грција денес бара од Република Македонија да си го смени името, а кој гарантира дека утре пак таа Грција не ќе побара да си ги смени и границите? Барањето на Грција, Република Македонија во своите граници да се вика како сака, а надвор од сопствените граници да има друго име, е повеќе одошто смешно, дури и комично барање.
Грција изгледа е под влијание на синдромот да менува имиња.
– Во Грција нема Турци, има муслимани.
– Македонци нема, тие се Грци
– Албанците се со грчко потекло и сл.
Меѓутоа, за јужниот дел на Албанија, или наречен Северен Епир, каде што живее грчко малцинство, односот и тврдењето на Грција се менуваат. Нив ги вика грчко малцинство во Албанија. Кога Албанија ќе спомене за албанското малцинство во Грција, таа најостро реагира, велејќи дека во Грција нема Албанци, туку тие се Грци што говорат на албански јазик.
За жал, Грција не може да се излечи од болеста на малцинствата – да ги менува. Но во тоа никогаш не успеала и нема да успее. Сѐ додека во светот има луѓе што ќе речат „ние сме Македонци“, Грција колку сака нека се труди, македонското име ќе живее. Впрочем, таков е и законот на природата.
МАКЕДОНСКИОТ ЈАЗИК Е ЕДИНСТВЕН
Меѓу македонскиот и грчкиот јазик не само што нема сличности туку тие немаат ниту дијалектичко единство. Во 1946 година во Скопје е отворен Филозофскиот факултет. Во составот на овој факултет е отворена и катедра за македонски јазик. Во 1944 година е формирана македонската држава и оттогаш македонскиот јазик станува државен јазик. Литературата на македонскиот јазик се развива уште од 19 век.
Во 1912 година во Македонија има:
Македонски цркви 76
Македонски свештеници 83
Бискупи ??????
Разни училишта 64
Учители 1.021
Горните показатели, исто така, доволно аргументирано го негираат грчкото тврдење дека македонската нација и јазик не постојат. Инаку, во наведените цркви и училишта, литургијата, односно учењето се вршело на македонски јазик. Грција во 1985 година донесува одлука дипломите добиени на скопскиот универзитет да не ги признава. Исто така, почнаа да не се признаваат и документите што се пишани на македонски јазик.
Во јануари 1989 година папата во Ватикан, обраќајќи му се на целиот свет, меѓу другите јазици, и на македонски јазик ја честиташе Новата година. За таа цел министерот за Тракија и Македонија, Папатемелис, многу остро протестираше кај папата зашто упати новогодишна честитка и на македонски јазик. Сепак, треба да ја прашаме Грција ако не постоеше македонскиот јазик, тогаш зошто папата и на тој јазик испрати новогодишна честитка. Или и тој како Тито веднаш измисли еден нов јазик? Или папата бил непријателски настроен спрема Грција?
Вистината е следна: „Македонскиот јазик не само што постои туку тој е доста употреблив и за таа цел папата се обрати до светот и на овој јазик “.
Во јуни 1990 година Ватикан објави и една книга на македонски јазик. И по овој повод од страна на Грција до Ватикан се упатија многу погрдни протести. Ако македонскиот јазик не постои, тогаш како можеше токму светиот престол, католичкиот свет од Ватикан, да упати новогодишни честитки и, исто така, да објави книга на македонски јазик?
Пратеникот на ПАСОК, Јоргос Пецос во февруари 1990 година, за да ги собере сите раководни луѓе и граѓани во новата партија, по селата во околијата на Воден и на Лерин, говореше на македонски јазик. Нели македонскиот јазик не постои? Нели македонскиот јазик нема своја граматика, не располага со доволен фонд на зборови? Колку и да сака нека негира Грција, вистина е дека македонскиот јазик не само што постои туку, еве, и раководните луѓе на Грција се служат со овој јазик, како што го истакнавме примерот со Пецос. Вакви и слични примери можат да се набројат уште многу!
(Продолжува)
