Во некои ресторани во Хрватска цените за угостителските услуги зависат од јазикот на кој се прави нарачката. Оваа честа практика на хрватските угостители, да применуваат посебни повисоки цени за странските гости, а пониски за домашните посетители, не е во согласност со законите и правилата на ЕУ, пишува „Дојче веле“ и наведува еден случај од Корчула каде што летувала германско-хрватска брачна двојка.
Членовите на ова семејство седеле на две различни маси, а испиеното кафе им било наплатено по различен ценовник. Мажот, кој говорел германски, платил двапати поскапо од сопругата.
Различен третман имаат странските и домашните гости и кога станува збор за количеството храна за едно исто мени. Кога келнерите помислиле дека гостите, маж и жена, не се домашни туристи туку странци им било донесено многу помалку храна во чинијата. По нивната реакција, келнерите се извиниле и ги замениле чиниите во кои имало многу повеќе храна.
Германските медиуми известуваат и за раширената појава за примена на различни цени во кафулињата и рестораните, иако од Министерството за економија на Хрватска истакнуваат дека не треба да се применуваат дискриминаторски цени во зависност од државјанството и од местото на ноќевање и престојување.
