Премиерот на Бугарија, Бојко Борисов, коментираше за апсењето на шпионска група, осомничена дека работела за Русија.
Тој рече дека Бугарија цврсто ќе ги брани својата безбедност и независност и им честиташе на обвинителството и на специјалните служби за работата што ја завршиле, пренесува БТА.
– Ова е уште еден случај во кој Бугарија ќе мора да ги прогласи руските дипломати за ‘персона нон грата’. Сакам да ја искористам оваа можност да им кажам на нивните водачи да престанат да шпионираат во Бугарија – рече Борисов.
Бугарското обвинителство на 19 март објави дека е приведена група лица осомничени за шпионажа во корист на Русија.
Беше наведено дека меѓу уапсените има и воени лица, како и претставници на Министерството за одбрана или воената разузнавачка служба, а уапсена е и сопругата на наводниот организатор на групата, која имала бугарско и руско државјанство.
