Во обемната анализа на весникот се посочува и дека британскиот јавен сектор се соочува со сериозни проблеми поради огромните финансиски побарувања на националниот здравствен систем без соодветни резултати, како и поради намалувањето на нивото на продуктивност
Сериозна системска нефункционалност го доведе Обединетото Кралство на работ на економска криза
Големината на долговите заедно со високата инфлација и даноци значи дека Велика Британија повеќе не може да ја зема здраво за готово својата финансиска стабилност, објавува британскиот весник „Телеграф“, врз основа на тврдењата на група врвни економски експерти.
Сметките за социјални давачки за лица во работоспособна возраст надминаа 123 милијарди фунти годишно, при што секој десетти жител на Британија прима директна парична помош од државата, со што системот за социјална помош сè повеќе личи на прототип на универзален основен приход отколку на механизам за поддршка на најзагрозените, укажува „Телеграф“.
Во обемната анализа на весникот се посочува и дека британскиот јавен сектор се соочува со сериозни проблеми поради огромните финансиски побарувања на националниот здравствен систем без соодветни резултати, како и поради намалувањето на нивото на продуктивност.
Згора, забележан е и постојан раст на даночниот товар, со што најбогатите десет отсто од населението плаќаат околу 60 отсто од вкупниот данок на доход, што создава систем што обесхрабрува работа и инвестиции, а тоа резултира со најниска стапка на капитални инвестиции меѓу најразвиените земји од Групата седум светски сили (Г7), се истакнува во написот на „Телеграф“.
Системот за планирање исто така го ограничува развојот, откако со години не се изградени нови резервоари или автопатишта, а бирократските процедури ја кочат изградбата на домови и на фабрики. Дополнителни слабости се забележани во миграциските политики и во монетарното управување, кое не успеало да ја запре инфлацијата. Е.Р.
Корените на кризата досегаат од крајот на минатиот век
Потребна сериозна економска реформа за да се избегне= запаѓање во хронична криза
Британски „Телеграф“ ги идентификува корените на кризата во 1997 година, кога лабуристите дошле на власт, по што наредните 28 години се одликувале со постојано поткопување на конкурентноста и на темелите на некогашната динамична пазарна економија.
Затоа се истакнува дека е потребна сериозна економска реформа во Велика Британија, преку намалување на јавните трошоци, дерегулација, реформа на даночниот систем и поефикасно финансирање на здравството за земјата да избегне запаѓање во хронична економска криза. Е.Р.
Економската политика неодржлива со актуелните политики
Економската состојба на Велика Британија е долгорочно неодржлива со сегашните политики, предупредува британската Канцеларија за буџетска одговорност (ОБР), а пренесува британски „Гардијан “.
Државниот долг може да се искачи на 270 отсто (сега е под 100 отсто) од бруто-домашниот производ до 2070 година доколку сегашната фискална политика остане непроменета. Велика Британија, во споредба со 36 развиени економии, моментално е на шесто место според државниот долг, петта е според дефицитот и трета во категоријата на највисоки трошоци за задолжување.
Растечките трошоци за државните пензии, клучните трошоци поврзани со климатските промени и зголеменото задолжување претставуваат три клучни фактори од кои потекнуваат главните ризици, според податоците на ОБР. Е.Р.
