Премиерот на Унгарија, Виктор Орбан, изјави дека Украина ќе мора да ги обнови испораките на нафта преку нафтоводот „Дружба“ доколку сака да добие финансиска поддршка од Европска Унија.
– Ако нема нафта, нема пари – порача Орбан во видео објавено на социјалните мрежи.
Тој информира дека разговарал со претседателот на Европски совет, Антонио Кошта, како и со премиерот на Словачка, Роберт Фицо, во врска со блокадата на испораките на нафта.
Орбан нагласи дека позицијата на Унгарија останува непроменета, повторувајќи дека Киев треба да ја обнови работата на нафтоводот „Дружба“ како предуслов за финансиска поддршка од Брисел.
Воедно, тој ја обвини Украина дека ја користи блокадата како средство за влијание врз внатрешно-политичките состојби во Унгарија, во корист на опозициската партија Тиса.
