Американскиот претседател Доналд Трамп преку Твитер се потсмева на својот колега, францускиот претседател Емануел Макрон поради проблемите со насилните демонстранти против зголемувањето на даноците на горивата во Франција.
– Мило ми е што мојот пријател Емануел Макрон и демонстрантите се согласија со мојот заклучок од пред околу две години – напиша Трамп во вчерашниот твит.
Тој понатаму додава дека Договорот од Париз потпишан во 2015 година не е добар.
– Парискиот договор е ужасно полн со недостатоци бидејќи ги зголемува цените на енергенсите за одговорните земји, додека ги прикрива некои од најлошите загадувачи – порача Трамп.
На почетокот на неделата францускиот премиер Едуард Филип одлучи да го одложи зголемувањето на данокот за гориво барем за шест месеци, како одговор на протестите кои траат со недели и често се насилни, а овој потег стана прво поголемо отклонување во политиката на администрацијата на Макрон за 18 месеци колку што е на власт.
