САД ги суспендираа летовите со кои требаше да се евакуираат Авганистанци, откако беа откриени случаи на големи сипаници за време на пристигнувањето на бегалците во Америка.
Документ на американската влада предупредува дека овој развој на настаните може да има значително влијание врз евакуацијата што започна кога талибанците го зазедоа Кабул, а многу Авганистанци ја напуштија земјата, објави „Ројтерс“.
Одлуката ја донесе американската погранична служба по препорака на Центрите за превенција и контрола на болести (ЦДЦ).
Портпаролката на Белата куќа, Џен Псаки, рече дека суспензијата се случила откако биле откриени сипаници меѓу четворица Авганистанци кои влегле на територијата на САД. Се уште не е познато дали зборовите на Псаки се однесувале на запирање на летовите од сите транзитни места каде што се сместени Авганистанците, или само на двете најголеми – Катар и Германија.
Суспензијата може „сериозно да ги загрози“ операциите во базата Рамштајн во Германија, една од најголемите транзитни точки, а американските летови исто така ќе бидат запрени од американската база Ус-Удеид во Катар. Некои од авганистанските бегалци се на пат кон САД, но тие се привремено сместени на одредени локации.
Во владиниот документ се наведува дека одлуката за прекин на летовите ќе има контра-ефект врз речиси 10.000 вакцинирани луѓе кои се во Рамштајн. Се додава дека многумина се таму повеќе од 10 дена и дека веќе се „уморни“.
Германија постави ограничување од 10 дена за Авганистанците да останат во американската база, а некои германски политичари и медиуми се побунија кога некои Авганистанци побараа азил во таа земја.
