Москва ги повикува Вашингтон и неговите сојузници да се откажат од плановите за соборување на легитимната власт во Венецуела, изјави денеска рускиот министер за надворешни работи, Сергеј Лавров.
– Ги повикуваме Американците и оние кои ги поддржуваат да се откажат од неодговорните планови и да дејствуваат исклучиво во рамки на меѓународното право – рече Лавров на состанокот со министерот за надворешни работи на Венецуела, Хорхе Ареаз, пренесува ТАСС.
Лавров потврди дека за ситуацијата во Венецуела и други глобални прашања утре ќе разговара со американскиот државен секретар, Мајк Помпео, во Финска.
– Средбата со Помпео е планирана за утре во Финска каде што се одржува дводневен состанок на Арктичкиот совет – посочи Лавров.
