Економијата на Кипар претрпе сериозен удар поради заминувањето на рускиот капитал од островот, пишува грчкиот весник „То Вима“ повикувајќи се на интернет страницата „Philenews.gr.“
Руските олигарси, кои беа столб на банкарскиот систем на Кипар, очигледно сакаат да го однесат своето богатство во други земји, затоа што во ЕУ се загрева борбата против перењето пари, пишува порталот и додава дека руските клиенти со многу брзо темпо ги затвораат своите банкарски сметки во Кипар.
За еден месец од островот се повлечени околу 93 милиони евра, а за два месеци, до крајот на февруари, биле повлечени депозити во вкупна вредност од 143 милиони евра.
Во споредба со пред една година, падот во депозитите изнесуваше 1,34 милијарди евра, а пред две години од банкарскиот систем на Кипар беа повлечени 2,65 милијарди евра руски пари.
Падот на руските депозити најверојатно е поврзан со се построгите одредби усвоени како дел од борбата на ЕУ против перењето пари.
Дури и по намалувањата или спасувањето на кипарските банки во 2013 година, руските депозити останаа на високо ниво.
Според податоците на Централната банка на Кипар, депозитите на крајот на 2013 година изнесувале 11,7 милијарди евра и паднале за 4,95 милијарди евра до крајот на февруари 2019 година.
Во периодот меѓу 2015 и февруари 2019 година, руските банкарски сметки се намалиле за околу пет милијарди евра.
