Бројот на загинати во земјотресот на Хаити се искачи на 1.297, а повеќе од 5.700 луѓе се повредени, објави службата за цивилна заштита за нов земјотрес.
Во земјотресот беа предизвикани одрони, што ја отежна операцијата за спасување, а премиерот на Хаити, Ариел Анри, прогласи вонредна состојба во траење од 30 дена.
Ситуацијата може да се влоши со доаѓањето на тропската бура Грејс, која се очекува вечерва да го погоди Хаити.
Центарот за урагани соопшти дека Грејс ја загуби својата сила од вчера, кога имаше ниво на бура, но дека може да донесе пороен дожд, поплави и свлечишта.
Стотици домови, училишта, хотели и други згради беа уништени во земјотресот со јачина од 7,2 степени според Рихтеровата скала што го погоди Хаити.
Земјотресот, чиј епицентар беше на 12 километри североисточно од Сент Луис ди Сид, речиси израмни некои градови и предизвика лизгање на земјиштето што ги прекина напорите за спасување во најсиромашната американска држава.
Во акциите за спасување на итните служби и населението, многумина беа извлечени од урнатините, но по многумина се уште се трага.
Најмалку 62 лица загинаа во поплавите во Турција, 77 се водат како исчезнати
Бројот на загинатите во катастрофалните поплави на северот на Турција вчера се искачи на најмалку 62 лица, а околу 77 се водат како исчезнати, објави турската агенција за катастрофи (АФАД).
Претходно беше објавено дека најмалку 58 луѓе го загубиле животот во поплавите.
Министерството за внатрешни работи објави дека 77 лица се водат како исчезнати, а осум лица се повредени и се хоспитализирани.
Претседателот Реџеп Таип Ердоган областите погодени од поплавите ги прогласи за област на природна катастрофа.
Во операциите за спасување и потрага учествуваат повеќе од 4.600 луѓе.
