Соединетите Американски Држави се незадоволни и гневни откако Русија осуди поранешен припадник на маринците на 16 години напорна работа поради обвиненија за шпионажа, пренесува Си-ен-ен.
Поранешниот маринец Пол Велан беше уапсен во хотелска соба во Москва пред 18 месеци со УСБ-уред, за кој безбедносните службеници велат дека содржел државни тајни.
Велан тврди дека е наместен, а судењето, кое не можел да го разбере поради отсуството на преведувач, го нарече „срамно и смешно“. Американскиот секретар Мајк Помпео побара Велан да биде ослободен.
– САД се лути од одлуката на рускиот суд што денес го осуди американскиот државјанин Пол Велан по пат на тајно судење, со тајни докази и без соодветни можности и шанса за одбрана – рече тој.
Велан беше прогласен за виновен за поседување класифицирани информации во градскиот суд во Москва. Неговите адвокати рекоа дека тој ќе поднесе жалба.
Во меѓувреме се појавија и сугестии дека Велан може да биде искористен во размена на руски затвореници кои се во притвор во САД, но портпарол на Кремљ изјави дека Велан не е политички затвореник.
Велан на последното судско рочиште дојде со испишан лист кој притоа го стави на стаклото од кафезот на судот за да го означи неговото судење како бесрамно. На телевизиските камери во понеделникот им беше забранети да снимаат, наводно како претпазливост на коронавирус. Велан ги осуди обвиненијата против него како фабрикувани и смешни.
На минатите сослушувања, тој беше видливо лут и фрустриран, се надвикуваше со судијата и ги обвинуваше испрашувачите. Во понеделникот, тој беше смирен, дури и се повремено се насмевнуваше, а им мавташе и на тројцата амбасадори кои дојдоа со цел да му дадат поддршка за време на судењето.
Велан ја нарече пресудата „претходно изречена“, а за време на изрекувањето тој стоел збунет, замолувајќи да му биде кажано сето тоа на англиски, но постојано бил игнориран од судиите.
Велан е државјанин на четири земји, САД, Канада, Велика Британија и Република Ирска. Воените записи покажуваат дека тој се приклучил на американските маринци во 1994 година, по шест години откако започнал да работи како полицаец во Мичиген. Двапати служел во Ирак, а првпат ја посетил Русија како маринец, по што следувале и други посети на земјата. Велан беше уапсен во хотелска соба во центарот на Москва во декември 2018 година.
Според неговите изјави, тој се подготвувал да присуствува на венчавка, кога негов стар пријател наеднаш се сретнал со него и му дал усб-уред, на кој Велан мислел дека се наоѓаат фотографии. Неколку моменти подоцна, безбедносните службеници упаднаале во собата и го уапсија за поседување на државни тајни.
По пресудата во понеделникот, неговото семејство во изјава рече дека рускиот правен систем е „прогласен за виновен за неправда“
– Одлуката на судот само го комплетира последниот дел од овој расипан судски процес. Се надевавме дека судот може да покаже одредена независност, но, на крајот, руските судии се политички, а не правни тела – стои во изјавата.
