Стотици активни пожари, главно предизвикани од громови последниве денови, уништија повеќе од милион хектари во Калифорнија.Четворица пожарникари настрадаа при гаснењето на огнените стихии, јави Си-ен-ен.
Американскиот претседател Доналд Трамп одобри дополнителни средства за закрепнување од пожарите. Најстариот државен парк во Калифорнија е тешко оштетен од пожарот.
Додека повеќе од 12.000 пожарникари се борат во Калифорнија против 560 пожари, гувернерот Гевин Њусом рече дека побарал средства и поддршка не само од другите држави на САД, туку и од Канада и Австралија.
Гувернерот рече дека Австралија е земја на најдобрите борци против пожарите во светот.
– Загрижени сме за тоа што ќе се случи после неделава, доколку има уште повеќе удари на гром и пожари. Што ќе значи тоа за пожарникарите кои би можеле да бидат на првите линии во наредните две, три недели или дури и еден месец – рече началникот на противпожарната бригада Лукас Спелман.
Една од причините за недостигот на ресурси е помалиот број затвореници кои обично помагаат во гаснење пожари, а сега беа ослободени од затворите поради пандемијата на ковид-19.
