Францускиот претседател Емануел Макрон се надева дека неговиот руски колега, Владимир Путин, ќе се приклучи на неговата иницијатива за глобален прекин на огнот во екот на пандемијата на ковид-19, изјави тој за „Радио Франс интернешенел“.
– Со Путин разговарав за тоа првично, кога првпат ја предложив оваа иницијатива. Не разговаравме повторно бидејќи добив одлучна потврда од другите лидери. Се надевам дека ќе го сторам тоа по неколку часа. Кинескиот лидер Сји Ѓинпинг ја потврди својата согласност со мене исто како и американскиот претседател Доналд Трамп и премиерот на Велика Британија, Борис Џонсон. Сигурен сум дека и Владимир Путин ќе се согласи – рече Макрон.
Заедничката изјава на лидерите на Евроазиската економска унија (Русија, Ерменија, Белорусија, Казахстан и Киргистан), усвоена по видео-конференцијата на 14 април, ги повикува сите држави да ја продолжат меѓународната соработка и покрај пандемијата.
– Да се зајакне довербата, да се запрат вооружените судири, трговските војни, едностраните финансиски и економски санкции и строго да се почитуваат нормите на меѓународното право – се вели во документот.
