Финското тело за нуклеарна безбедност СТУК објави дека нивото на зрачење во нуклеарната единица „Олкилуото 2“ на западот на земјата се зголемило околу 13 часот.
Исто така се наведува дека немало протекување на радијација и дека ситуацијата е под контрола.
– Ова е значаен и исклучителен инцидент и е многу важно да се обезбедат точни информации за настанот – изјави пред новинарите финската министерка за социјални работи и здравство Ајино Кајиса Пеконен, пренесе „Ројтерс“.
Јармо Танхуа, извршен директор на операторот на нуклеарната централа ТВО, рече дека инцидентот е необичен настан во историјата на објектот.
Меѓународната агенција за атомска енергија (МААЕ) денес соопшти дека Финската управа за радијација и нуклеарна безбедност (СТУК) информирала за настанот во блокот 2 на нуклеарната централа „Олкилуото“.
Во нуклеарната централа измерни биле зголемени нивоа на радијација и реакторот е исклучен, се вели во соопштението на МААЕ, пренесе „Ројтерс“.
Централата „Олкилуото 2“, со капацитет од 890 мегавати, ја стопирала работата до сабота.
Немало истекување на радијација во животната средина, потврдија надлежните.
