Ескалирачката воена активност на НАТО на украинско тло и во Црното Море и зголемениот број заеднички воени вежби не придонесуваат за решавање на конфликтот во Донбас, изјави портпаролката на руското Министерство за надворешни работи, Марија Захарова, пренесува ТАСС.
– Годинава се планирани седум заеднички вежби со земјите од НАТО на територијата на Украина, што значи дека посебни маневри се случуваат на секои шест до осум недели. Сето ова не придонесува за решавање на украинскиот проблем. Последната сесија на Контакт-групата одржана на 19 мај уште еднаш демонстрира отсуство на каква било желба кај преговарачите во Киев да најдат компромис и да дејствуваат во согласност со словото и духот на договорите од Минск – истакна Захарова.
Руското Министерство за надворешни работи фрли светло врз минатонеделниот безбедносен форум што се одржа во Киев, на кој членови на украинското раководство ги посочиле подготовките за борба против, како што се вели, непостоечката руска закана, како главна задача на земјата во оваа сфера.
„Во оваа политика се вклопуваат и неодамнешните барања на украинскиот претседател Владимир Зеленски да ги зголеми трошоците за одбрана за периодот 2021-2022 година на не помалку од 5 отсто од украинскиот БДП – нагласи Захарова
Украина троши 7,5 милијарди долари годишно на воени подготовки и е на прво место во светот по темпото на воени трошоци.
– Овие милитаристички планови од Киев одат рака под рака со акумулирањето на трупите на НАТО на територијата на Украина и во Црното Море. Како што знаете, алијансата ги почна ‘Дефендер Европа 21’, најголемите вежби во последните 25 години што вклучуваат 28.000 војници од земјите на НАТО и нејзините сојузници – истакна таа.
