Во интервју за Фокс Њуз, извршниот директор на „Фејсбук“, Марк Закерберг ја критикуваше социјалната платформа Твитер за одлуката да обележи два твита на американскиот претседател Доналд Трамп со линкови за проверка на факти, велејќи дека приватните компании „не треба да бидат арбитер на вистината“, пренесува „Форбс“.
Иако „Фејсбук“ ги трга рекламите што ги обесхрабруваат луѓето да гласаат, Закерберг рече дека твитовите на Трамп, кои исто така се објавени како статуси на Фејсбук, не ги кршат нивните правила. Закерберг исто така верува дека секој обид на Трамп или федералната влада да цензурира компании за социјални медиуми не е „вистинскиот чекор“.
– Уверен сум дека „Фејсбук“ не треба да биде арбитер на вистината, за сè што луѓето велат преку Интернет. Приватните компании не треба да заземаат таква позиција – вели тој.
Трамп вчера се закани дека ќе ги регулира компаниите за социјални медиуми откако „Твитер“ на платформата обележа две негови објави во врска со гласањето со назнаката за „проверка на факти“, во која се вели дека претседателот лажно тврди дека гласачките ливчиња по пошта ќе доведат до лажирани избори и голема изборна измама, повикувајќи се на „Вашингтон пост“ и Си-Ен-Ен.
Републиканците веќе долго време тврдат дека „Фејсбук“, со седиште во либералното упориште на Силиконската долина, е пристрасен против конзервативците, а проверката на фактите на Твитер само ја засилува оваа критика, со тоа што Трамп објави дека „Твитер“ се меша во претседателските избори и го задушува слободниот говор. Републиканецот Мет Гаец рече дека подготвува нацрт-закон за враќање на делот 230 од Законот за комуникација за пристојност, важна правна заштита што ги спречува технолошките платформи да бидат одговорни за она што го објавуваат нивните корисници.
Од изборите во 2016 година, Закерберг неколкупати изјави дека приватните технолошки компании не треба да одлучуваат што е вистина, а што не. „Фејсбук“ беше обвинет претходно годинава, затоа што им овозможува на политичарите да лажат во нивните објави без да бидат проверени. „Твитер“, од своја страна, се раздели од „Фејсбук“ и целосно го забрани политичкото рекламирање на нивната платформа.
