Џеф Безос, најбогатиот човек на светот, понуди да ги покрие трошоците на НАСА во износ од две милијарди долари, со цел американската вселенска агенција да го преиспита потпишувањето на договор со него за изградба на возила за слетување на Месечината.
За потсетување, НАСА во април им го додели договорот на Илон Маск и неговата компанија „Спејс екс“ и ја одби понудата на Безос.
Договорот предвидува изградба на систем за слетување што би ги донел астронаутите на Месечината најрано во 2024 година, пренесува „Би-би-си“. Иако се очекуваше двете компании да соработуваат во проектот, НАСА може да го додели договорот само на една поради недостаток на средства.
Од 3,3 милијарди долари што ги побара од Конгресот, НАСА доби само 850 милиони долари за да изгради возило за да слета на Месечината. Безос рече дека со неговата компанија ќе го надмине недостатокот на буџетско финансирање.
