Во напад во воз во Токио, кој денеска го изврши маж вооружен со нож, повредени се 17 луѓе, од кои тројца потешко.
Напаѓачот прво со нож ранил неколку патници, а потоа предизвикал пожар, поради што патниците скокнале од прозорците, соопшти полицијата. Тој е идентификуван како 20-годишен маж, а е уапсен на лице место. Напаѓачот е осомничен за обид за убиство, а мотивот сѐ уште не е познат.
Очевидци рекле на полицијата дека напаѓачот носел светла облека и изгледал како лик од стрипови или некој што оди на прослава на Ноќта на вештерките.
Откако ги избодел патниците со нож, осомничениот истурил течност слична на масло и предизвикал пожар во кој изгорел дел од седиштата. Денешниот инцидент е втор напад со нож на воз во Токио во последните два месеца.
Во август, ден пред затворањето на Летните олимписки игри во Токио, 36-годишен маж избоде десет патници во воз. Подоцна ѝ рекол на полицијата дека сакал да нападне жени кои изгледале среќни.
