Земјотрес со јачина од 8,2 степени според Рихтер се случи во близина на Алјаска, а издадено е предупредување за цунами за Северните Маријански острови и Гуам, објави Американскиот институт за геолошки истражувања (УСГС).
Во соопштението се наведува дека земјотресот бил регистриран на 105 километри југоисточно од градот Перивил, во близина на брегот на Алеутските Острови.
Институтот претходно потврди дека јачината на земјотресот е најмалку 7,2 степени според Рихтеровата скала, а подоцна забележа дека може да достигне и 8,2 степени. Епицентарот на земјотресот бил на длабочина од 35 километри.
Американскиот систем за предупредување од цунами соопшти дека земјотресот бил со јачина од 8,1 степени, додека Европско-медитеранскиот сеизмолошки центар (ЕМСЦ) објави дека јачината на потресот била осум степени според Рихтер.
