Швајцарскиот тенисер Роже Федерер застана во одбрана на собирачите на топки, откако минатата недела Шпанецот Фернандо Вердаско предизвика инцидент на турнирот во Шенжен.
Шпанскиот тенисер нервозно гестикулираше додека ја чекаше крпата, а потоа почна да му вика на момчето. За ваквото однесување тој беше критикуван од јавноста, но и од колегите.
– Дефинитивно треба да се покаже почит кон самите собирачи на топки и одличната работа што ја вршат. Но, некогаш е тешко да се контролираат емоциите – истакна швајцарскит тенисер.
Федерер во младоста бил собирач на топки и истакна дека девојчињата и момчињата кои ја извршуваат оваа работа го разбираат притисокот под кој играат тенисерите, но дека најважно за нив е да стекнат позитивно искуство на турнирите.
– Собирачите на топки се исклучително важни, бидејќи тие се иднината на нашиот спорт. Како дете бев среќен по завршувањето на турнирот и си мислев дека тоа е одлично искуство. Немаше ништо негативно, така да не сакаме да помислат дека не се доволно ценети или дека на некому не му се допаднале или пак дека им е ужасно. За ова треба да се размислува – истакна Федерер.
Тој е слободен во првото коло на Мастерсот во Шангај, а во второто коло ќе се соочи со Данил Медведев од Русија.
