Новак Ѓоковиќ и Виктор Троицки ги совладаа фаворизираните Пабло Карењо Буста и Фелисијано Лопез со 6-3 и 6-4 по сетови за Србија да го освои АТП купот, натпреварувањето кое се оддржува првпат на стартот на австралиската тениска сезона.
Прво во сингл, Роберто Баутиста Агут лесно го победи Душан Лајовиќ, за потоа во дерби-пресметката во сингл, Ѓоковиќ да биде подобар од светскиот број еден, Рафаел Надал за израмнување на 1-1. Надал реши да паузира во мечот во двојки, давајќи му шанса на Ѓоковиќ годината да ја стартува со титула.
По поразот, Надал не беше задоволен од прегласните српски навивачи кои направија атмосфера како во Дејвис купот. Откако загуби сервис во седмиот гем од сетот, тој се пожали на судијата на столче Мохамед Лахјани, а на навивачите им покажа кренат палец.
„Искрено, публиката беше фантастична во сите денови натпреварување, но понекогаш некои луѓе од некои земји не сфаќаат како функционира тенисот, мислат дека тоа е фудбал. Почитувањето мора да биде тука, а мал дел од публиката не се однесуваше така“, изјави Надал.
