КАРАТЕ – ПРЕМИЕР-ЛИГА
Презадоволен сум од настапот во Истанбул, кој го оценувам како многу успешен. Почнав таму каде што завршив пред почетокот на ковид-19, со голем резултат, изјави Павлов
Двократниот европски првак и најдобар македонски каратист во борби, репрезентативецот Емил Павлов (категорија до 60 кг), го освои бронзениот медал на силната Премиер-лига во карате, која викендов се одржа во Истанбул, Турција, по едногодишна пауза, поради пандемијата на коронавирусот. Во борбата за третото место, членот на КК Штип, со 4-1, го победи Казахстанецот Каизар Алписбаир.
Претходно Павлов ги елиминира Азербејџанецот Аминга Гулиев (3-0), Јорданецот Аеф Гаит (3-2) и Шпанецот Матијас Гомез (8-3), додека во полуфиналето загуби од Азербејџанецот Фирдовски Ферзалиев (2-5).
– Презадоволен сум од настапот во Истанбул, кој го оценувам како многу успешен. Почнав таму каде што завршив пред почетокот на ковид-19, со голем резултат, поточно по една година без натпревар. Но овој медал не е случаен, откако почна пандемијата јас не ни престанав со тренинзите, постојано вежбав и вежбам нови елементи, кои ќе ми помогнат во следниот период за мојата најголема цел, а тоа е норма и медал од Летните олимписките игри (ЛОИ) во Токио. Во Истанбул остварив четири победи и еден пораз. Во борбата за бронзата одработив максимално паметно и концентрирано и заслужено победив. Добро го познавам Казахстанецот, знаев што ме чека, го анализиравме сето тоа со селекторот Сашко Арсовски, успеав да го изненадам со ножна техника, а ја имав и контролата на татамите во текот на целата борба. Едноставно, бев подготвен на физички и психички план, како да не сум имал пауза од една година – ни изјави Павлов по освоениот медал.
На годинашново премиерно издание во Премиер-лигата во карате настапија над 600 учесници од 69 држави, од 280 клуба. Од другите македонски учесници (вкупно 16), Берат Јакупи (до 84 кг) забележа три победи, а во четврт-финалето загуби од искусниот турски претставник Угур Акташ, кој, пак, не се пласира во финалето, а со тоа пропадна и шансата за Јакупи да обезбеди бараж-борби. Виктор Крстевски (до 84 кг) забележа две победи, но, исто така, без репасаж.
Премиер-лигата во Лисабон, ЕП (од 19 до 23 мај) и квалификациите за ЛОИ во Париз (од 11 до 13 јуни) се настаните каде што ќе можат уште да се освојуваат бодови потребни за пласман на ЛОИ во Токио.
