Ова партнерство е неверојатна можност да се развива играта, преку воведување на шахот кај нова публика и инспирација на следната генерација играчи. Да се биде дел од семејството на е-спортот е неверојатна можност за шахот да го прошири својот досег до огромна група љубители на е-спортот, вели Магнус Карлсен
Шахот ќе биде вклучен во Светскиот куп во е-спорт (ЕСК) во 2025 година, односно ќе биде поврзан со е-спортска заедница. Најдобрите светски онлајн-шахисти ќе се натпреваруваат во Ријад (Саудиска Арабија) за награден фонд од 1,5 милион долари, настанот ќе се одржи од 31 јули до 3 август 2025 година, пишува специјализираната шаховска интернет-страница „Чесбејс“. Времето за размислување во текот на партиите ќе биде 10 минути по играч, без зголемување.
Дванаесет шахисти што се надеваат да се натпреваруваат на Светскиот куп во е-спорт ќе се квалификуваат преку Шаховската турнеја на шампионите, која ќе биде домаќин на две онлајн турнеи во февруари и во мај. Последниот квалификациски натпревар ќе се одржи во Ријад, за избор на последните четири учесници на Светскиот куп.
Тој натпревар ќе биде отворен за играчи аматери и за професионални играчи, пишува специјализираната шаховска интернет-страница „Чесбејс“. Најсилниот шахист на оваа ера Магнус Карлсен е прогласен за глобален амбасадор на шахот на Светскиот куп во е-спорт.
Онлајн шахот е повеќе од само поврзување на шахот со компјутер. Со алатки како инстант контрола на времето и пред потези, онлајн шахот всушност се менува од неговиот дигитален медиум. Ова ја прави играта различна од традиционалните варијанти на табла, што значи дека онлајн шахот бил е-спорт и пред да биде измислен терминот е-спорт.
Оваа контрола на времето е еден од најбалансираните формати на шах, кој им нуди на играчите доволно време да ја покажат својата стратегиска брилијантност преку добро обмислени потези, додека одржуваат брзо темпо што ги одржува мечевите возбудливи за гледање и за игра, пишува „Чесбејс“ на својата интернет-страница.
– Донесувањето на шахот, мајката на сите стратегиски игри, на Светскиот куп во е-спорт е навистина возбудлив момент. Партнерството со водечката онлајн платформа за играта chess.com и легендарниот Магнус Карлсен ни овозможува не само да го прикажеме шахот на голема сцена туку и да поттикнеме иновации и раст во неговиот веќе жив екосистем. Нетрпеливи сме да видиме како нашите клубови го прифаќаат овој нов предизвик и како оваа соработка може да го подигне конкурентниот шах на уште поголеми височини – рече Ралф Рајхерт, извршен директор на фондацијата за Светскиот куп за е-спорт, пренесе „Чесбејс“.
Она што неодамна се промени е екосистемот околу шахот. Онлајн шахот постигна огромни придобивки во популарноста во изминатите неколку години, со платформи како „Чес“, сега со стотици милиони члена. Поттикнат од објавувањето на драмата на Нетфликс „Дамин гамбит“ и зголемената популарност на шаховските стримери на Твич и Јутјуб, шахот е трансформиран од класична игра во непобитен глобален феномен што го играат луѓе од сите возрасти и потекло.
Карлсен, кој се смета за еден од најголемите шахисти во историјата, се приклучува на Светскиот куп во е-спорт како амбасадор за да помогне во поврзувањето на шахот со пошироката е-спортска заедница преку прикажување на менталната стратегија и натпреварувачкиот дух што шахот ги дели со другите е-спортови од највисоко ниво.
– Возбуден сум што гледам како шахот им се приклучува на некои од најголемите игри во светот на Светскиот куп во е-спорт. Ова партнерство е неверојатна можност да се развива играта, преку воведување на шахот кај нова публика и инспирација на следната генерација играчи. Да се биде дел од семејството на е-спортот е неверојатна можност за шахот да го прошири својот досег до огромна група љубители на е-спортот – изјави Карлсен, пишува „Чесбејс“. Г.И.
