Првите тестирања на зоната за одраз покажуваат јасно влијание врз текот на натпреварот и искуството на гледачите, пишува СА
Како дел од фокусот на Светската атлетика (СА) на иновациите, клучен столб на нејзиниот четиригодишен стратегиски план „Пионерска промена (2024-2027)“, зоната за одраз во скок во далечина неодамна првпат беше тестирана за време на натпреварот на Светската атлетска турнеја во сала.
Развојот на спортот е важен за да се обезбеди релевантност, забавата и возбудата продолжуваат да ги поттикнуваат натпреварите со користење нова технологија, системи, истражувања и податоци за да се подобрат привлечноста и влијанието на натпреварите низ целиот свет, пишува Светската атлетика.
Зоната за одраз е меѓу множеството иновации што се развиваат и тестираат, при што концептот беше дел од натпреварувачката програма на митингот во Дизелдорф на 9 февруари и во Берлин на 14 февруари. Додека се составуваат целосните извештаи, раните повратни информации покажуваат дека тестот на зоната на одраз имал јасно влијание врз текот на натпреварот и искуството на гледачите. Во двата настана, престапите паднаа на 13 отсто од историскиот просек од 32 проценти и веројатно ќе се намалат дополнително додека атлетичарите се подготвуваат и тренираат за оваа нова конфигурација, пишува СА.
Анкетите на гледачите покажаа вкупна предност за зоната за одраз во идните натпревари. Раните податоци сугерираат дека зоната на одраз го обезбедува очекуваното подобрување од 10 сантиметри во скоковите. Тестовите, исто така, дадоа јасни индикации дека атлетичарите ја приспособуваат стратегијата за залет.
Со оглед на тоа што и двата митинга ги мереа скоковите според традиционалните правила, стапката на престап според традиционалните правила достигна 66 отсто, висока бројка во нормални услови. Ова сугерира дека атлетичарите усвојуваат стратегија со висок ризик, знаејќи дека ризикот од престап е помал, пишува СА. Н.М.
