Фото: ЕПА

Стаклените терени веќе се појавуваат во НБА и на меѓународно ниво, како технолошка алтернатива

Крис Торнтон сака да зборува за играње кошарка на површините со најкревкиот звук: стаклото. Торнтон е управен директор на одделот за Америка на „АСБ гласфлор“, германска компанија што гради подови направени од споени слоеви на сигурносно стакло што покрива ЛЕД-панели, а терените се многу подинамичен визуелен празник, со приспособени линии за играње, логоа, бои, анимирана графика и реклами за повеќе спортови, пишува агенцијата „Асошиејтед прес“ (АП). Во кошарката, каде што дрвото уште е водечко, Торнтон гледа потенцијал за раст на стаклените терени, кои веќе се појавуваат во НБА и на меѓународно ниво, како технолошка алтернатива. Изгледа чудно на прв поглед, големи, силни спортисти скокаат и трчаат преку стаклен терен. Тоа е иднината што ја замислува компанијата повикувајќи се на технолошки подобрувања што овозможуваат безбедна и одржлива површина со зачудувачки визуелни слики што може да се сменат со неколку допири на апликација за паметен телефон или за таблет, пишува АП.
Торнтон рече дека стаклената површина има флексибилност што ја надминува онаа на дрвото, потпомогната од дизајнот со пружина на алуминиумската и челичната рамка под ЛЕД-облогата. Има и керамичка обвивка со точки врежани во стаклото, што нудат контакт и конзистентна површина без ситуации што може да се појават на дрвени терени, пишува АП. Таа комбинација ја натера компанијата да промовира зголемен безбедносен потенцијал за спортистите, дури и во тоа полесно да се забележува потта што треба да се избрише.
– Постои стигма за стаклото: „О, ќе се скрши, тешко е, луѓето ќе паднат низ него“. Всушност е сосема спротивното – рече Торнтон.
Визуелните слики се најголемата продажна точка. Менаџерите на арената би можеле лесно да го ажурираат изгледот на теренот наместо да користат простор за складирање дрвени делови за повеќе дизајни и да плаќаат труд за да ги инсталираат или ажурираат, или тренерите би можеле да постават свои режими за вежбање со визуелни знаци на теренот, пишува АП.

Згора, тимот би можел дури и да се определи за изглед на панелите како од дрво, во согласност со традицијата. Цената е повисока од таа на дрвените терени, но Торнтон не прецизира сума, само посочи на потенцијална продажба на закупи на терените, велејќи дека компанијата имала „напредни“ разговори со колеџ-тимови и лиги. Стаклени ЛЕД-терени веќе се во домашните арени на Баерн во Германија и на Панатинаикос во Грција, тие исто така се користени на настани од раководното тело на Светската кошаркарска федерација (ФИБА), пишува АП. Во САД, Кентаки искористи еден во октомври за настанот што го означува почетокот на кошаркарската сезона. НБА понуди приказ за време на олстар-викендот на НБА во 2024 година, одржувајќи го своите натпревари за вештини, за три поени, во забивање и во шут помеѓу Стивен Кари и Сабрина Јонеску во Индијанаполис.
Во декември компанијата формира тренинг-центар во Орландо давајќи им на НБА-тимовите шанса да тренираат на стаклениот терен и да понудат повратни информации. Торнтон, кој рече дека НБА купила малцински удел во одделот на компанијата за Америка, процени дека досега го тестирале повеќе од 100 играчи и тренери, пишува АП.
– Како што се интегрираме со другите даватели на податоци и во НЦАА и во НБА, само ќе стануваме подобри. Фокусот до денес беше да се добие подлога што е удобна за спортистите да играат, и ние го направивме тоа – рече тој. Н.М.