Се одржа вториот турнир на зимскиот младински шаховски фестивал „Езерска кралица“
Со учество на 55 момчиња и 21 девојче (вкупно 67 учесници од Македонија и девет од Албанија) во Струга се одржа второто еднодневно издание на зимскиот младински шаховски фестивал „Езерска кралица“ во четири возрасни категории (до осум, 10, 12 и до 14 години). Турнирот е дел од традиционалниот фестивал „Езерска кралица“, кој годинава слави петгодишен јубилеј. Се играа шест кола, со темпо од 10 минути плус пет секунди по секој потег. Момчињата и девојчињата играа во исти групи, но наградите за освоени места беа доделени посебно. Во категоријата до осум години (18 момчиња и четири девојчиња) победија Јуан Гури (1.522) со шест и Миа Цаку (1.463) со четири поени, и двајцата од Албанија. До 10 години (22 учесници) славеа Јон Фејзулаху (1.419) со шест и Катја Поп-Николова со четири поени, и двајцата од Македонија. До 12 години (14 момчиња и три девојчиња) најуспешни се Аилин Ндреко (1.668) со шест и Берат Аталко (1.624) со пет поени, и двајцата од Албанија. Во категоријата до 14 години (13 шахисти и две шахистки) први беа Димитар Симоновски (1.841) од Македонија со шест и Албанката Ирис Хаско со 3,5 поени. Г.И.
Кошаркарот Вембањама играше шах со минувачи во Њујорк
Виктор Вембањама отиде во парк во Њујорк и одигра еден на еден со навивачите во саботата, дури и загуби неколку натпревари, но не во кошарка. Вембањама играше шах, пишува кошаркарската НБА-лига на својата интернет-страница. Пред Сан Антонио спарс да замине од Њујорк во Минесота, Вембањама објави повик на социјалните мрежи: „Кој сака да ме сретне на југоисточниот агол на паркот Вашингтон Сквер за да играме шах? Таму сум“, напиша Вембањама.
Луѓето почнаа да се појавуваат речиси веднаш. Паркот Вашингтон Сквер е познато место за шах во Њујорк меѓу другите таму играл и Боби Фишер, и тоа е место што се користи за повеќе филмски сцени за шахот, пишува НБА. Вембањама беше таму еден час, одигра четири меча, победи на два и загуби на два дуела.
– Потребен ни е шаховски турнир само за играчи во НБА, а приходите да одат во добротворна организација по избор на победникот – напиша тој на социјалните мрежи по завршувањето на шаховските мечеви во Њујорк, пренесе НБА. Н.М.
