Во машка конкуренција ќе настапат 10 пливачи, а во женска седум пливачки од вкупно седум држави
ДЕНЕСКА ЌЕ СЕ ОДРЖИ 38. МЕЃУНАРОДЕН ОХРИДСКИ ПЛИВАЧKИ МАРАТОН
Седумнаесет учесници од седум држави ќе учествуваат на 38. издание на традиционалниот меѓународен Охридски пливачки маратон, кој ќе се одржи денеска на патеката Климе Савин од „Свети Наум“ до Охридското пристаниште.
Во машка конкуренција ќе настапат 10 пливачи. Од Македонија ќе пливаат Александар Илиевски Леонид Мишевски, Петар Цеков и Лазар Поп Трајков. Од Италија ќе пливаат Матео Фурлан, Федерико Тамборино и Марко Инглима, од Аргентина Акуилес Балаудо и Матиас Дијас Хернандес, а од Португалија ќе плива Хуго Риберио. Во женска конкуренција, пак, ќе пливаат седум натпреварувачки: Росана Гошева од Македонија, Ерика Абигал Јенсен и Мајте Ајлен Пука од Аргентина, Елена Лионело од Италија, Милица Љубисављевиќ од Србија, Еда Сајин од Турција и Алисја Гедриш од Полска.
Да потсетиме дека Матеус Еванжелиста од Бразил и Каролина Жуис од Франција триумфираа на маратонот што се одржа минатата година. За да стигне прв до целта, на Еванжелиста му беа потребни пет часа, 45 минути и пет секунди, додека Жуис триумфира со време од пет часа, 46 минути и 51 секунда. Втор во машка конкуренција на целта стигна Марсел Шутен од Холандија, додека третопласиран и најдобар кај македонските пливачи беше Евгениј Поп Ацев, кој пред неколку дена оствари голем подвиг со тоа што стана петтиот Македонец кому му успеа да го преплива каналот Ла Манш (по Нико Нестор, Атина Бојаџи, Томи Стефановски и Игор Димовски).
Втора кај жените лани беше Мајте Пука од Аргентина, додека третопласирана на целта доплива Французинката Инес Делакроа, која, патем, за првпат настапи на маратонот на Охридско Езеро. Г.И.
