ИОК ВО ПРЕСРЕТ НА ЗОИ 2026 (3)
Во пресрет на ЗОИ 2026, Интернационалниот олимписки комитет објави серија со која објаснува интересни детали за спортовите што се играат на мраз и на снег
- Кога спортистите во санкањето ѝ мавтаат на публиката, еден детаљ на нивните ракавици веднаш го привлекува вниманието, шилците на прстите. Овие ракавици се важни за експлозивен почеток на трката, по што брзините може да достигнат до 145 км/ч, што го прави санкањето најбрзиот зимски спорт на ЗОИ
Во санкањето секој детаљ е важен. На Зимските олимписки игри (ЗОИ) во Милано и во Кортина д`Ампецо в година успехот ќе зависи не само од техниката на спортистот туку и од неговата опрема.
– Потребни ви се тркачки костим, специјални чевли и кацига со визир. Потребни ви се и ракавици со шилци за брзо да ја зголемите брзината на стартот – објасни трикратниот златен олимписки медалист Феликс Лох од Германија во разговор за интернет-страницата на Интернационалниот олимписки комитет (ИОК).
Шилците на ракавиците играат централна улога. Откако ќе се оттурнат од рачките, спортистите се влечат напред со моќни потези слични на веслање. Шилците на нивните прсти го обезбедуваат допирот со мразот потребен за силно оттргнување од мразот.
Ракавиците за санкање обично се изработени од лесна, флексибилна кожа, но, сепак, остануваат издржливи и совршено приспособени на секоја рака. Металните шилци со максимална должина од пет милиметри се распоредени на два милиметри еден од друг и се поставени на показалецот, средниот прст и на домалиот прст. Пределот на дланката на ракавиците е дополнително обложен за да се обезбеди сигурен стисок на санката.
За време на трката санкачите лежат рамно на грб, со рацете притиснати блиску до телото. Управувањето се потпира на минимални движења, користејќи ги лентите на санката и суптилни поместувања на тежината. Брзините може да достигнат до 145 км/ч, што го прави санкањето најбрзиот зимски спорт на олимписките игри.
Секоја рака е различна, како и ракавиците, кои се приспособени во рамките на правилата, за секој спортист. Како се прицврстуваат шилците на ракавиците? Шилците не се зашиени, тие се поставуваат како мали капи преку ракавиците, а потоа се прицврстуваат со селотејп. Секој спортист може да го користи својот метод на лепење. Американската санкачка Самер Бричер, трикратна олимпијка (во 2014, 2018 и во 2022 година), ја усовршила својата техника.
– Секој има различна стратегија како ги прицврстува. Но, мојата е само комбинација од лента за електрика и лента за хокеј или спортска лента за да ги направам совршено приспособени на моите прсти на начин што мислам дека е најдобар – изјави таа за „Тим САД“, пренесе ИОК.
Во почетокот на нејзината кариера Бричер користела метални капачиња. Во зимските месеци прстите ги се чувствувала болно студени.
– Мислите дека ќе ги изгубите врвовите на прстите. Пред неколку години, некој всушност смислил „еј, имаме доволно силни други материјали со кои не треба да страдаме“ – се сеќава таа.
Не само што еволуирале ракавиците туку и поставувањето на шилците се променило со текот на времето. Три недели пред Зимските олимписки игри во Пекинг во 2022 година, Бричер го скршила средниот прст, шок непосредно пред врвот на сезоната. Туркање со полна сила? Невозможно. Таа се сети на стара техника од 1980-тите години, кога шилците биле прикачени на зглобовите на прстите, а не на прстите. Шилците на прстите подоцна станале стандардни бидејќи дозволуваат поголема флексибилност, а методот на зглобовите на прстите бил заборавен.
– Всушност ги зедов шилците, ги скратив, малку ги сменив и ги ставив на зглобовите за да веслам со нив. Имав шилци на зглобовите во денешно време, па беше малку тешко, но не завршив на последното место – рече Бричер, која беше 23-та меѓу 35 учеснички во поединечна конкуренција на ЗОИ 2022, користејќи шилци на зглобовите. Н.М.
