ФОРМУЛА 1
- Се чувствувам гордо, но не затоа што ќе се разбудам утре и ќе кажам дека ги победив сите. Горд сум не само затоа што можам да кажам дека сум светски шампион туку и затоа што чувствувам дека направив среќни многу други луѓе, рече Норис, 11-от британски светски шампион во Ф1
Британскиот возач Ландо Норис (26) од Мекларен со солзи во очите ја освои својата прва шампионска титула во Формула 1, освојувајќи го третото место, но доволно да биде прв на трката за Големата награда на Абу Даби (ОАЕ), со два бода предност пред Холанѓанецот Макс Ферстапен од Ред Бул, во последната трка од годинешнава сезона. Ферстапен, пак, мина прв низ целта во Абу Даби, што беше осма негова победа годинава, една повеќе од Британецот и неговиот колега од Мекларен, Оскар Пјастри. Мекларен постојано ја контролираше трката полна со тензии, иако Ферстапен беше на пат кон победа од првиот круг, бидејќи Пјастри заврши втор и беше во позиција да му помогне на Норис доколку е потребно. Со тоа Норис стана 11-от британски светски шампион во Ф1 на крајот од својата седма сезона во Ф1, година што ја започна бавно, но зеде залет во втората половина од годината. Ова е и првата двојна титула на Мекларен во конкуренција на возачи и конструктори од 1998 година, а прв шампионат на возачи освоен од тимот на Мекларен по првата титула на Луис Хамилтон во 2008 година.
– Не сум плачел подолго време и не мислев дека нема да плачам, но плачев. Се чувствувам неверојатно, сега знам како се чувствува Макс. Сакам да им честитам на Макс и Оскар, моите двајца најголеми конкуренти во текот на целата сезона. Беше задоволство и чест да се тркам против двајцата, а научив многу и од двајцата. Уживав, беше долга година, но победивме и многу сум горд на сите – рече Норис, кој за првпат стана светски првак, пренесе „Би-би-си“.
Иако Мекларен е најбрзиот болид во Ф1 во целина сезонава, шампионатот со Норис ќе добие дополнителен кредибилитет со фактот дека го освои пред тежок предизвик од Ферстапен, кој е широко признат како најдобриот возач на својата генерација. Но смиреното и контролирано возење на Норис со Мекларен до титулата, битката помеѓу Норис и Јуки Цунода од Ред Бул, додека Јапонецот се обидуваше да му помогне на Ферстапен на средината од трката и кратката закана со казна за возачот на Мекларен, доминантната победа на Ферстапен што ја круниса можеби најимпресивната година во неговата кариера, беа клучните моменти од последната трка, пишува Би-би-си“.
– Неверојатно е. Многу е надреално, знаете. Долго време сонував за овој момент. Секој сонува. Многу работи влегуваат во сезона како оваа, многу подеми, многу падови. Но ништо од тоа не е важно сѐ додека се обидувате да излезете на врвот, а тоа е она што успеавме да го направиме. Не е само годинава туку во текот на последните седум или осум години бев со Мекларен, а последните 16-17 години од мојот живот се обидував да го остварам овој сон и, ете, денес сите го направивме тоа, па многу сум среќен – потенцираше Норис.
Ферстапен, кој имаше цел да го израмни рекордот на Германецот Михаел Шумахер од пет титули во низа, сепак не успеа.
– Постојано гледав во ретровизорот и се надевав дека ќе се појави нешто. На секој прав дел, постојано гледав дали се случува нешто, но не се случуваше. Тоа е тркање, и не сум премногу загрижен за тоа. Не жалам за мојата сезона – рече Ферстапен по трката.
Норис уште како мал силно беше поддржан од своето семејство во градењето на неговиот возачки талент и подем. Почна да се трка со картинг на осумгодишна возраст и беше на пол-позиција за својот прв национален настан. Норис, кој има двојно белгиско државјанство преку неговата мајка, е роден во Бристол и пораснал во Гластонбери. Неговата јуниорска кариера го обележи како потенцијален иден светски шампион во Ф1. Ресурсите на неговото семејство му обезбедија сѐ што му беше потребно за да му овозможи на неговиот талент да цвета. И кога стигна до Ф1, веднаш сфати дека го има она што е потребно за својата животна амбиција со „победа на свој начин“, пишува „Би-би-си“.
– Се чувствувам гордо, но не затоа што ќе се разбудам утре и ќе кажам дека ги победив сите. Горд сум не само затоа што можам да кажам дека сум светски шампион туку и затоа што чувствувам дека направив среќни многу други луѓе – додаде новиот шампион Норис, кој својот прв официјален настап во Ф1 го имаше во 2018 на гран-прито во Австралија. Г.И.
