Никогаш досега не е направено на олимписки игри, што, всушност, е мошне изненадувачки за мене. Ние ќе се грижиме за семејствата, не само за спортистите, рече Вон, пренесе АП. ИОК му ги додели ЗОИ 2034 на Солт Лејк Сити, за кој Вон со гордост вели дека ќе има барем едно село за сместување на семејствата, заедно со превоз, билети, преведувачки услуги и друга логистичка помош
Кога Линдзи Вон, сега веќе пензионирана скијачка, се вклучи во обидот Солт Лејк Сити (САД) да ја добие организацијата на Зимските олимписки игри (ЗОИ) во 2034 година, таа имаше очигледен фокус, сакаше да им го олесни животот на семејствата на спортистите, пишува агенцијата „Асошиејтед прес“ (АП).
Во минатата недела, Интернационалниот олимписки комитет (ИОК) му ги додели Игрите на Солт Лејк Сити, за кој Вон со гордост вели дека ќе има барем едно село за сместување на семејствата, заедно со превоз, билети, преведувачки услуги и друга логистичка помош.
– Никогаш досега не е направено тоа на олимписки игри, што, всушност, е мошне изненадувачки за мене. Ние ќе се грижиме за семејствата, не само за спортистите – рече Вон во интервјуто во саботата на Летните олимписки игри (ЛОИ) во Париз, пренесе АП.
Вон (39) освои три златни медали на четири ЗОИ од дебито во Солт Лејк Сити во 2002 година до ЗОИ во Пјонгчанг пред шест години. Повредите ѝ ја прекинаа кариерата, а последната операција на коленото ѝ овозможи само рекреативно да се врати на падините.
За разлика од пријателот Марсел Хиршер, австриско-холандскиот тркач во алпско скијање, враќањето на патеките не е во план. На ЗОИ 2034 таа ќе гледа, нема да се натпреварува.
– Освен ако на карлинг не му треба друг член, можеби би можела да го научам тоа – се пошегува Вон.
Вон присуствуваше на блескавата церемонија на отворањето во Париз на реката Сена и веќе направи неколку белешки за тоа што е можно во Солт Лејк Сити. Голем дел од нејзината енергија до овој момент беше насочена кон откривање како да придонесе за победничка понуда. Таа сега живее во северна Јута и се надева дека ќе направи да се чувствува како дом на спортистите и нивните најблиски.
Организаторите на Игрите во 2034 година планираат да ги сместат спортистите и нивните најблиски членови на семејството во кампусот на Универзитетот во Јута на само четири километри од центарот на Солт Лејк Сити. Тимот сега работи со универзитетот за да одреди колку легла може да обезбеди, раната процена во мај ја стави бројката помеѓу 1.000 и 2.000.
– Всушност една од нашите најголеми предности во понудата беше семејното село веднаш до нормалното спортско село, со што ќе биде многу полесно – рече Вон.
Водачите на понудата на Солт Лејк Сити велат дека создале еден од најкомпактните распореди во историјата на Олимписките игри, со сите планирани места на еден час возење од спортското и од семејното село. Конечниот план што им го претставија во средата на олимписките службеници не бара нова трајна градба, а сите 13 места веќе се поставени и секое играше улога кога градот првпат беше домаќин на ЗОИ. Тесно поврзаната природа на Игрите означува големо подобрување за спортистите на кои често им било тешко да поминуваат време со семејството и да ги гледаат соиграчите како се натпреваруваат во други спортови додека патуваат за свои настани.
Друга неодамна пензионирана американска ѕвезда, спринтерката Алисон Феликс, стоеше зад напор сличен на планот на семејното село на Вон, создавајќи го првиот оддел за спортисти со мали деца во Олимпиското село во Париз. Просторот има цел да го намали стресот од организирање грижа за децата за време на натпреварувањето, истовремено дозволувајќи им на спортистите да бидат поблиску до нивните деца, на кои не им е дозволено да останат со своите родители во селото. Според планот на Вон, тие би можеле да бидат сместени со други членови на семејството само неколку блока подалеку. Н.М.
