Имав и малку страв и голема доза на претпазливост, прво дали ќе може воопшто да стартувам со оглед на непредвидливоста на Ла Манш и тешкотиите што ги носи со себе, како и фактот дека пред две години имав тешка хипотермија
ИНТЕРВЈУ: ЕВГЕНИЈ ПОП АЦЕВ, ПЛИВАЧКИ МАРАТОНЕЦ
Македонскиот пливачки маратонец Евгениј Поп Ацев (37), тројниот светски шампион во маратонско пливање, зад себе има еден куп освоени трофеи, остварени победи, успеси. Неговата активна маратонска кариера траеше од 2007 до 2021 година, притоа во 2015 и во 2017 година триумфира на Светската гранпри-серија во маратонско пливање, а во 2019 година беше најуспешен и на ултрамаратонската серија на Светската пливачка федерација (ФИНА). Тој настапи на 106 трки од светска класа во 21 држава, а девет години се качуваше на подиумот во генералниот пласман. На 18 мај 2024 година во Канкун (Мексико), за своите големи достигнувања во овој спорт, дипломираниот стоматолог Поп Ацев стана член на Куќата на славните на маратонското пливање.
Кон овие успеси, Поп Ацев, кој почнал со пливање на девет години, сега додаде уште еден, и тоа огромен, што претставува голем предизвик за секој пливач на долги патеки. Тој стана петтиот Македонец кому му успеа да го препливал страшниот канал Ла Манш. Патеката од Франција до Англија успеа да ја преплива со одлично време од девет часа и 43 минути. Претходно Ла Манш успеаја да го препливаат Нико Нестор во 1959 година, Атина Бојаџи во 1969-та, Томи Стефановски во 2009-та и Игор Димовски во 2010-та.
Од другите позначајни успеси на Евгениј може да се издвојат 13. место на Светското првенство (25 км) во 2019 година, победа на маратонот Капри-Неапол во 2016 година, петти вкупно во Светскиот куп (СК) на 10 км во 2019 година, триумф на Охридскиот маратон во 2015-та, а во 2023 година беше прв на Илинденскиот куп во Охрид…
Како мина препливувањето и дали времето беше како што посакувавте?
– Препливувањето помина добро, со неколку мали кризи и тешкотии, оти овде условите се поинакви, а има и други предизвици што демнат. Времето не беше многу добро, но за Ла Манш тоа е очекувано. За разлика од трките каде што се бориш и со други пливачи, на што сум навикнат, овде се бориш самиот со себе.
Што претставува за вас овој успех во вашата богата и успешна пливачка кариера?
– Ла Манш ми претставуваше голем предизвик, кој многу сакав да го препливам, и затоа многу ми значи што конечно успеав. Имав еден неуспешен обид, а следната година поради лошите временски услови се откажа. Годинава исто така поради лошото време го промашив терминот кога плимата е поволна за пливање, но на крајот ми се даде шанса да стартувам на последниот ден, и тоа при неповолна плима.
Очекувавте ли дека сега ќе ја остварите оваа голема цел или, сепак, постоеше извесна доза на страв, односно некои фактори што ќе ве спречат во таа намера?
– Имав и малку страв и голема доза на претпазливост, прво дали ќе може воопшто да стартувам со оглед на непредвидливоста на Ла Манш и тешкотиите што ги носи со себе, како и фактот дека пред две години имав тешка хипотермија.
Дали со овој успех вашиот сон во маратонското пливање е целосно исполнет?
– Да. Ла Манш ми беше последната цел и ја чував за крај. Најмногу мислев да не паднам во хипотермија и да го одржувам темпото, бидејќи сега не се тркав со никого. Во текот на пливањето си поставував некои мали цели на секој час-два, а најмногу за главната цел – да стигнам на целта.
Кој ве следеше со чамецот додека пливавте во студените води?
– Татко ми, брат ми и Џон Мијат од Англија, со кого понекогаш заедно тренираме во Англија.
Додека пливавте девет часа, ви поминуваа ли мисли како им било на другите четворица Македонци кога го препливувале Ла Манш пред вас?
– Секако. Претпоставувам дека и другите четворица македонски маратонци поминувале низ истото тоа што го минав и јас. Можеби некому му било потешко, некому полесно…
Каналот е долг 33 км, но со струите знаете ли колку километри препливавте?
– Не знам точно колку километри, но сигурно три-четири повеќе, особено поради тоа што водната струја ме однесе под `ртот, каде што требаше да завршам, па морав да се враќам назад спроти водната струја.
Која беше разликата пред две години, кога не успеавте, и сега?
– Пред две години, иако бев поподготвен физички за пливање отколку сега, сепак не бев за толку студена вода. Затоа за ова препливување и се подготвував повеќе.
Инкогнито заминавте да го препливате каналот, барем за пошироката македонска јавност?
– Моите блиски знаеја дека ќе пливам, а и немам навика да најавувам, особено за оваа пригода, кога и не се знаеше дали ќе можам да стартувам воопшто, а и имав лош реден број. Требаше на да пливам 19 август, а пливав дури на 25 август.
Кога се враќате во Македонија?
– Брат ми и татко си заминаа, а јас ќе останам во Англија и ќе почнам со работа тука од следната недела.
Ќе работите според вашето академско образование?
– Да, стоматологија…
