На три партии до крајот, Индиецот поведе со 6-5
ШАХ – МЕЧ ЗА ТИТУЛАТА СВЕТСКИ ПРВАК
Индиското шаховско чудо, 18-годишниот Домарају Гукеш (2.783 рејтинг-поени), направи огромен чекор на патот да стане најмладиот шампион во историјата на класичниот шах. Во 11-та партија од мечот за светски првак во Сингапур, во која и двајцата минаа речиси по еден час размислување за само еден потег, Гукеш по вторпат го победи шампионот Динг Лирен (2.728) од Кина и поведе со 6-5. Следната партија се играше вчера, а „бел“ беше Лирен.
Со бели фигури Гукеш за првпат во кариерата отиде во обратниот гамбит на Блуменфелд, жртвувајќи пион за иницијатива. Базата на податоци откри само една партија одиграна од Лирен со ова отворање (забрзан шах во живо).
– Многу тешка партија за мене. Веќе на четвртиот потег не бев сигурен дали го направив правилниот избор. Се сетив на една партија што ја играв на забрзан турнир со ВМ Адибан Баскаран, но не можев да се сетам на другите потези. Потрошив 40 минути за непотребни варијанти – рече Лирен.
Новост во партијата беше 5…Лг4, а Динг веќе потроши половина од неговото вкупно време. На деветтиот потег, Гукеш можеше да игра ц5 и да го развие својот ловец, но тој ја затвори кралицата, а потоа размислуваше еден час, што им овозможи на коњите на Динг да создадат одредени закани во центарот. Гукеш ја искористи предноста жртвувајќи го б-пионот и потоа притисна со сите фигури на страната на кралицата по б-линијата и дијагоналата х1-а8. На крајот, временскиот притисок се покажа како одлучувачки. На седум минути до крајот, Лирен згреши, па наместо 28….Сб4, за да го врати својот пион со шанси за реми, тој одигра погрешно Дц8 и по 29. Дц6 на Гукеш, веднаш се предаде.
– Честитки до мојот тим за вложениот труд во подготовката на ова отворање, кое го изненади мојот противник – рече Гукеш по партијата.
Г.И.
