- Во интервју за „Чeсбејз Индија“, претседателот на ФИДЕ, Аркадиј Дворкович, зборува за важноста на новата турнеја „Светско првенство во тотален шах“, промените во правилото за рејтинг, успехот на Годината на социјалниот шах, состојбата на Светската шаховска федерација…
Светската шаховска федерација (ФИДЕ) долго време размислуваше за нов формат каде што можеме да комбинираме различни временски контроли и да се приспособиме на реалноста на побрзиот, дигитален свет, но, исто така, да го одразиме постојниот висок интерес за класичен и за брз шах. Бевме среќни што Норвешкиот шах излезе со иницијатива да направи нешто такво. Од самиот почеток имавме јасно разбирање дека можеме да го направиме тоа само заедно. Веруваме дека овој проект ќе донесе многу нови гледачи и возбуда за играчите. Повеќето од врвните играчи веруваат дека тоа е многу интересен формат, рече претседателот на ФИДЕ, Аркадиј Дворкович, во интервјуто за „Чeсбејз Индија“, пренесе Светската шаховска федерација.
Вистинско време да се зголеми важноста и на другите формати
Тој го нагласи ставот на ФИДЕ дека „титулата за светската титула во класичен шах е најважна… но верува дека е вистинско време да се зголеми важноста и на другите формати“.
Новото партнерство со Норвешкиот шах е долгорочна обврска заснована на осумгодишен договор со можност за продолжување. Тој изрази посветеност на соработка со сите партнери за да се постигне „универзална турнеја“, слична на тенисот, каде што секој врвен настан е важен и каде што може да се постигне консензус за контрола на времето, усогласен со возбудливиот формат на светско првенство.
Во претходните години, Светската шаховска федерација го усоврши својот пристап кон употребата на т.н. вајлд-карти, специјални покани што обезбедуваат учество и на талентирани играчи во подем и на шаховски легенди на врвни светски настани.
– Секогаш им даваме шанси на многу млади играчи затоа што можеме да го видиме нивниот потенцијал. На овој начин, покажуваме дека сме свесни за брзиот раст на овие играчи. Исто така, имаме правило да им даваме вајлд-карти на ветераните. Почнавме да користиме конкурентен пристап за вајлд-картите, кажувајќи им на играчите дека можат да играат едни против други за да се утврди кој ќе се квалификува – објаснува Дворкович.
Зборувајќи за неодамнешните целни измени на правилникот на ФИДЕ за рејтинг, тој рече дека организацијата „не дозволува т.н. фарминг на рејтингот“ од врвни шахисти што играат против значително понискорангирани ривали. Признавајќи дека такви дуели се можни на отворен настан или шаховски олимпијади, Дворкович забележа дека „многу такви мечеви“ јасно сугерираат дека „тоа е вештачко“, пренесе ФИДЕ.
– Мислам дека најдовме добро решение – рече Дворкович, истакнувајќи дека целта на промената никогаш не била да се спречи кој било играч да се квалификува за Турнирот на кандидатите.
На темата за рејтингот на Светската шаховска федерација, вклучително и во однос на прашањето за рејтинзите на неактивните играчи, Дворкович рече дека тоа е „исклучително тежок“ комплексен систем, при што анкетите на јавното мислење и дискусиите покажуваат длабока поделба во шаховската заедница за какви било промени.
– Кога ги прашуваме играчите, нормално нема консензус. Но повеќето играчи не се задоволни што неактивните рејтинзи се чуваат во системот. Луѓето сакаат рејтинзите да ја одразуваат вистинската сила на играчите – рече Дворкович, пренесе ФИДЕ.
Од Година на социјалниот шах до Година на шахот во образованието
Во разговорот за „Чесбејз Индија“, Дворкович се осврна и на социјалните иницијативи, кои станаа една од клучните алатки во пристапот на Светската шаховска федерација за вклучување на пошироката, непрофесионална шаховска публика.
– Му покажавме на светот дека шахот е комбинација од професионална и социјална мисија за подобрување на општеството. Годината на социјалниот шах им помогна на многу влади во светот да ја видат социјалната вредност на шахот, што доведе до тоа тие да почнат да даваат поголема поддршка за играта не само на натпреварувачка основа туку како алатка за општествено ангажирање и израмнување. Тука не зборуваме за медали, туку за општеството. Од оваа перспектива, годината беше успешна. Тоа не значи дека ќе ги завршиме тие проекти на 31 декември, ќе ги продолжиме. За следната година, веќе постои договор за Година на шахот во образованието. Општата идеја е да се привлече вниманието на владите, шаховските федерации и на приватните инвеститори кон важноста на шахот во училиште уште од рана возраст – рече, меѓу другото, Дворкович, во интервју за „Чесбејз Индија“, пренесе Светската шаховска федерација.
Тој рече дека шахот за жени е еден од јасните приоритети на Светската шаховска федерација.
– Секоја година ги зголемуваме наградните фондови и организираме повеќе турнири. Имаме шест настани на гран при за шахистки, имаме зголемување на наградниот фонд на Турнирот на кандидатки и на Гранд-швајцарското првенство за жени. Исто така, во однос на тоталниот шах се согласивме дека нашите партнери ќе продолжат да го организираат својот турнир на највисоко ниво за жени. Можеби во одреден момент би можеле да имаме турнеја за шахистки или да ја комбинираме со гран при. Но не сакаме да го изгубиме класичниот временски формат, напротив, сакаме да го дополниме со побрзи контроли на времето – рече Дворкович, пренесе ФИДЕ.
Претседателот на ФИДЕ вели дека Светската шаховска федерација сега е финансиски одржлива и има поголем интерес за шахот од кога било, со многу настани.
– Имаме општествена мисија што ја извршуваме. Се обидуваме да работиме како еден тим и секој што сака да се придружи е добредојден. Го диверзифицираме финансирањето, пристапувајќи до партнери од различни делови на светот. Се обидуваме да ги направиме нашите активности навистина привлечни за спонзорите, организирајќи настани на највисоко професионално ниво и мислам дека луѓето го ценат тоа. Секогаш учиме и секогаш се обидуваме да се подобриме. Јас сум таков и нашиот тим е таков – рече Дворкович, пренесе ФИДЕ. Г.И.
