ЗОИ 2026 – АЛПСКО СКИЈАЊЕ
- Сигурно сум подобар скијач. Но ако слушате метал, не сум толку лош, рече Парис по освоената бронза во спуст на ЗОИ 2026
Хевиметал-пејачот можеби има нов материјал за песна – неговиот олимписки бронзен медал. Кога не се натпреварува во скијање, Доминик Парис од Италија е лидер на групата наречена „Рајс оф волтаж“, а без разлика на сцената, тој наоѓа начин да биде во центарот, пишува агенцијата „Асошиејтед прес“ (АП). Во саботата Парис (36) го освои својот прв олимписки медал во спуст на своите петти Зимски олимписки игри (ЗОИ), во Милано и во Кортина д`Ампецо. Фактот дека медалот дојде на патека што ја познава толку добро и имаше можност да го сподели вниманието со Џовани Францони, неговиот млад сонародник, кој освои сребро, само го надополнува моментот.
Кратко откако ја доби бронзата, Парис погледна кон патеката Стелвио, место каде што победил седум пати на патеката во трки од Светскиот куп, со сјаен поглед.
– Прекрасна, тешка планина. Одлично е што ја имаме оваа домашна публика тука – рече Парис.
Тој и Францони приредија доста добра претстава за домашната публика во трката што ја освои Фрањо фон Алмен од Швајцарија. Тоа беше горд момент за Парис, кој е ментор на 24-годишниот Францони. Во текот на својата кариера, Парис победи во 24 трки од Светскиот куп и има титула од Светското првенство во супервелеслалом во 2019 година. Негов најдобар пласман во неговите девет претходни олимписки трки беше четвртото место во спустот на Игрите во Пјонгчанг во 2018 година.
– Досега имав убава кариера. Да се има овој успех на овој рид значи многу. Светското првенство е различно. Олимписките игри се навистина посебни, никогаш не знаете што ќе се случи. Се потрудив толку многу на другите олимписки игри кога бев во добра форма и бев млад и имав моќ – рече Парис.
Францони замислуваше момент како овој во декември. Тој му кажа на Парис колку би било посебно ако двајцата бидат на истиот подиум.
– Ова е најголемата сцена за споделување подиум со него. Многу сум среќен поради тоа. Ми даде многу совети во текот сезонава, на Светското првенство, и навистина го ценам тоа. Тој е толку силен човек, легенда и чест е да се биде во неговиот тим – рече Францони.
Овој медал можеби ќе го поттикне Парис да создаде песна. Неговата група е формирана во 2017 година, а го издадоа својот прв албум, наречен „Време“, една година подоцна. Тие се опишани како грув метал-бенд. Во 2024 година го издадоа вториот албум наречен „Бегство“, кој се одликува со потежок звук. Имаат турнеја што почнува во јуни, пишува АП.
– Сигурно сум подобар скијач. Но ако слушате метал, не сум толку лош – рече Парис, пренесе АП. Н.М.
